BENKI YA USHIRIKA KUZINDULIWA RASMI MAKAO MAKUU YA NCHI, DODOMA APRILI 28,2025

Imetumwa : April 25th, 2025

Na. Hellen M. Minja

       Habari – DODOMA RS

Benki ya Ushirika Tanzania (COOP Bank of Tanzania) inatajwa kuwa ya kipekee kutokana na kusimikwa kwenye misingi ya Ushirika, uchumi shirikishi na maendeleo ya pamoja hivyo kuifanya kuwa chombo cha kuwezesha maendeleo ya kiuchumi kwa watu wa kawaida katika jamii.

Hayo yamebainishwa leo Aprili 25, 2025 na Mkuu wa Mkoa wa Dodoma Mhe. Rosemary Senyamule katika Mkutano na Waandishi wa Habari uliofanyika kwenye ukumbi wa Mikutano Ofisini kwake Jijini humu juu ya uzinduzi rasmi wa Benki hiyo utakaofanyika Aprili 28, 2025 kwenye Kituo cha Mikutano Jakaya Kikwete huku Mgeni rasmi akitarajiwa kuwa Rais wa Tanzania Mhe. Dkt. Samia Suluhu Hassan.

“Benki hii ni ya kipekee inayomilikiwa kwa ubia na Vyama vya Ushirika, wanachama wao, vikundi vya kijamii na Taasisi za Ushirika kutoka nchini. Ni Benki iliyosimikwa katika misingi ya ushirika, uchumi shirikishi na maendeleo ya pamoja. Kupitia mfumo wa umiliki wa hisa, kila Mtanzania anayo nafasi ya kuwa sehemu ya mafanikio ya benki hii ikiwa ni chombo cha kuwezesha maendeleo ya uchumi wa watu wa kawaida.”

Aidha, Mhe Senyamule ameongeza kuwa Benki hiyo inaanza rasmi kazi zake ikiwa na Matawi manne (4) katika Mikoa ya Dodoma, Kilimanjaro, Mtwara (Tandahimba) na Tabora, sambamba na mawakala zaidi ya 52 waliopo katika vijiji na miji mbalimbali nchini ambapo inaifanya kuwa karibu zaidi na wananchi hasa ambao hawajafikiwa na huduma za kifedha.

Kadhalika, Mkurugenzi Mtendaji wa Benki hiyo Bw. Godfrey Ng’urah, amesema Benki hiyo ni ya kibiashara kwa wanaushirika hivyo, itachagiza shughuli za kilimo, shughuli za kinamama, kuongeza thamani ya mazao pamoja na shughuli za biashara kwa wafanyabiashara wadogo na wa kati pamoja na kurudisha enzi za ushirika katika nchi.

Uzinduzi huo utatanguliwa na Kongamano la Kitaifa la Wanaushirika Aprili 27, 2025 likiwa na mada kuu: “Tafakuri na Mijadala juu ya Historia, Changamoto na Fursa za Uwekezaji katika Sekta ya Ushirika kuchochea Ukuaji wa Uchumi na Kuondoa Umaskini” litakalozinduliwa na Waziri Mkuu wa Tanzania Mhe. Kassim Majaliwa.

#dodomafahariyawatanzania

#keroyakowajibuwangu

#mtiwangubirthdayyangu

#karibumwengewauhuru2025mkoawadodoma