WATANZANIA WATAKIWA KUILINDA NA KUIDUMISHA AMANI NI KURUHUSU MAENDELEO NCHINI

Imetumwa : May 15th, 2025

Na; Happiness E. Chindiye

   Habari - Dodoma RS

Shime imetolewa kwa Watanzania kuendelea kuilinda na kuidumisha Amani iliyopo ili kuruhusu maendeleo yanayofanyika Nchini ambayo wakati mwingine huchukua muda mrefu kuyafikia.

Hayo yamesemwa na Mkuu wa Mkoa wa Dodoma Mhe. Rosemary S.Senyamule aliposhiriki maombi maalum ya kuliombea Taifa kuelekea uchaguzi Mkuu, yaliyoandaliwa na kanisa la Anglikana Parishi ya Msalato A . Jijini Dodoma.

Mhe. Senyamule amewataka Watanzania kudumisha amani hiyo kwa nguvu kubwa.

 “Nchi yetu imeendelea kuwa na amani kutokana na misingi imara iliyojengwa na Mwenyezi Mungu mwenyewe  kwa utashi mkubwa unaosimamiwa na Viongozi wetu tangu uhuru hivyo tuendeleze hii amani na utulivu. “

Naye  Askofu Mkuu wa Kanisa la Anglikana Tanzania Dayosisi ya Central Tanganyika Dkt.Dickson Chilongani  ameeleza malengo ya ibada hiyo ni kuomba amani na utulivu wakati wote wa uchaguzi, kuombea tume ,vyombo vya ulinzi na  usalama , upatikanaji wa rasilimali zote zitakiwazo wakati wa uchaguzi , watu kujitokeza kupiga kura  pamoja na kumwombea Rais .

Sambamba na hayo Mkuu wa Mkoa ametoa rai kwa Wananchi kushiriki kikamilifu kujiandikisha/kuboresha taarifa zao katika daftari la kudumu la mpiga kura ambalo  pazia litafunguliwa rasmi kesho tarehe 16 hadi 22 mwezi huu.

&&&

#dodomafahariyawatanzania

#wekezadodomastawishadodoma

#keroyakowajibuwangu

#mtiwangubirthdayyangu