BENKI YA USHIRIKA TANZANIA KUCHAGIZA UKUAJI UCHUMI WA DODOMA

Imetumwa : March 26th, 2025

Na. Hellen M. Minja,      

       Habari – DODOMA RS      

Benki ya Ushirika Tanzania imefungua Ofisi zake za Makao Makuu Jijini Dodoma na kujipambanua kuwa itatengeneza mifumo itakayoendana na Dira za Mkoa na kuitofautisha na nyingine kwa kuchagiza kukuza uchumi wa wananchi wake.

Hayo yamebainishwa na Mkurugenzi Mtendaji wa Benki hiyo Bw. Godfrey Ng’urah alipomtembelea Mkuu wa Mkoa wa Dodoma Mhe. Rosemary Senyamule Ofisini kwake katika Jengo la Mkapa Jijini Dodoma Machi 26, 2025.

Lengo la ujio huo ni kujitambulisha na kutambulisha Benki hiyo kuwa imehamia Mkoani hapa kwa kujenga Ofisi zake za Makao Makuu na wapo tayari kushirikiana na Mkoa katika kutekeleza vipaumbele vya Mkoa hasa kuinua uchumi wa wananchi wake kwa kuwawezesha wanawake na vijana.

Ameongeza kuwa Benki yake ni ya ushirika kwa maana ya kwamba wamiliki wakubwa wa hisa ni vyama vya Ushirika wanaomiliki zaidi ya asilimia 51 ya Benki, sekta binafsi mchanganyiko, watu binafsi (vyama), wajasiriamali na wafanyabiashara kwa 19%, Serikali kupitia TIRA wanamiliki 10%.

Mkuu wa Mkoa Mhe. Senyamule amesema; “Dodoma tuna kipaumbele mwaka huu ambacho ni kukuza uchumi wa wananchi kupitia kilimo ambapo 72% ya wanadodoma ni wakulima, utalii, kuufanya Mkoa wa Dodoma kuwa wa Kilojistiki (Logistic hub) lakini pia kupitia Madini ambayo aina nyingi zaidi yanapatikana hapa”

Benki hiyo ambayo inahusisha vyama vya ushirika vya kilimo na kifedha, imeshafungua matawi manne katika Mikoa ya Tabora, Mtwara (Tandahimba), Kilimanjaro (Moshi) na Makao Makuu yake Dodoma huku ikiwa kwenye mchakato wa kujenga matawi mengine katika Mikoa ya Dar es Salaam, Kagera na Mwanza.

#dodomafahariyawatanzania  

#wekezadodomastawishadodoma                          

#keroyakowajibuwangu  #mtiwangubirthdayyangu