BILIONI 3.4 KULIPA FIDIA ZA ARDHI DODOMA

Imetumwa : January 9th, 2024

Serikali ya Mkoa wa Dodoma Chini ya Mhe. Senyamule imedhamiria wananchi wake kuishi kwa Amani na utulivu kwa kutatua kero na changamoto za wananchi ikiwemo kero zitokanazo na madai ya fidia za ardhi zilizotwaliwa kwa matumizi mbalimbali ya Serikali hivyo shilingi Bilioni 3.4 zimetolewa kwa dhumuni la kuwalipa fidia wananchi wa Jiji la Dodoma.

 Hayo yameelezwa Januari 8, 2024 na Mkuu wa Mkoa wa Dodoma Mhe . Rosemary Senyamule wakati  wa Uzinduzi wa mpango mkakati wa kushughulikia migogoro ya ardhi uliofanyika katika viwanja vya shule ya Msingi Mbabala katika Halmashauri ya Jiji la Dodoma.

 Ni Katika hafla ya Uzinduzi wa ulipwaji fidia  ambapo umekabidhiwa mfano wa hundi yenye jumla ya shillingi 3,068,705,727.81 zitakazolipwa kwa wananchi 314 na malipo kufanyika baada ya uhakiki wa uhalali wa fidia na timu iliyoundwa na Mkuu wa Mkoa, hatahivyo jumla ya wananchi 127 wanakidhi vigezo na wanalipwa jumla ya madai ya shillingi 1,735,901,727.81.

 Mhe. Senyamule ametumia jukwaa hilo kuwasihi wananchi kutunza mazingira kwa kuendelea kutekeleza ajenda  mbalimbali za mazingira ikiwa ni pamoja na kila kaya kupanda miti isyopungua mitano hususani katika msimu huu wa mvua.

 "Tuendelee kutekeleza kampeni mbalimbali za mazingira kwani zipo nyingi zikiwemo 'soma na mti' kila kaya kupanda miti si chini ya mitano na nyinginezo ili kukijanisha Jiji letu " ameeleza Mhe. Senyamule

 Pia, amesisitiza utunzaji wa Jiji la Dodoma kwa wananchi kuzingatia taratibu za mipango miji ikiwemo kufuata taratibu za ujenzi wa nyumba za makazi uliopangwa na Jiji ili kuhakikisha Unadhifu wa Jiji unazingatiwa.

 Aidha, Mkuu wa Wilaya ya Dodoma Mhe.Jabir Shekimweri amewasihi wananchi ambao hawajajitokeza kuhakikiwa viwanja vyao,  wajitokeza ili waweze kulipwa madai yao sahihi na halali kwa mujibu wa makubaliano yao na Serikali.

 Mpango mkakati huo umetokana na kukithiri kwa migogoro ya ardhi ndani ya Jiji la Dodoma hali iliyopelekea Mhe. Majaliwa Kassim Majaliwa, Waziri Mkuu wa Jamuhuri ya Muungano wa Tanzania kuunda tume kwa ajili ya kuchunguza chanzo cha migogoro ya ardhi katika Jiji la Dodoma ambapo baada ya Tume hiyo kubaini changamoto mbalimbali ikiwemo kuchukuliwa kwa maeneo ya wananchi hao kwa matumizi na maslahi mapana ya Taifa ikabiriki Fedha hizo kulipwa kwa wote waliokidhi vigezo.

 Miongoni mwa kata zinazonufaika na fidia hizo ni pamoja na  Iyumbu, Chigongwe, Mbalawala, Makole, Zuzu, Kikombe, Mtumba, Chahwa, Miyuji na Msingi Mlimwa C ambazo zote zinapatikana ndani ya Wilaya ya Dodoma.