DODOMA YAHITIMISHA JUMA LA WADAU WA ELIMU

Imetumwa : March 25th, 2024

Mkoa wa Dodoma umefanya Mkutano wa wadau wa Elimu Mkoa Leo Machi 25, 2024 ikiwa ni kilele cha Juma la wadau wa Elimu lililozinduliwa rasmi Machi 19. Mkutano huo umehudhuriwa na mgeni rasmi, Waziri Mkuu wa Jamhuri ya Muungano wa Tanzania Mhe. Kassim Majaliwa kwenye ukumbi wa TAG Mipango, Jijini Dodoma.

Lengo hasa la Mkutano huo ni kujadili namna ya kukabiliana na changamoto mbalimbali zinazoikabili sekta ya Elimu Mkoa wa Dodoma pamoja na kuweka mikakati ya kuinua Taaluma na ufaulu kimkoa pamoja na kuzindua rasmi Mpango Mkakati wa Elimu Mkoa wa DodomWaziri Mkuu ameipongeza Dodoma kwa kuandaa Mkutano huo kwani unakwenda sambamba na Sera ya Elimu ya nchi.

"Kauli mbiu ya Mkutano huu inakwenda sambamba na Sera ya Elimu ya nchi inayosisitiza Uwajibikaji. Utoaji wa Elimu Bora ni vipaumbele vya nchi. Serikali yetu inaimarisha mazingira ya utoaji Elimu kwa kuboresha miundombinu na Elimu bila ada kwani mpaka Sasa shilingi Trilioni 1 zimetolewa kufanikisha hili.

"Niwasihi Maafisa Elimu Kata kufuatilia maendeleo ya shule zenu kila wakati kwa kuwatembelea walimu wenu na kusikiliza kero zao. Walimu nanyi hakikisheni munafanya tathmini ya uelewa wa wanafunzi kwa kuwapatia mazoezi mengi kadri inavyobidi. Fedha zinazotolewa kwa ajili ya maendeleo ya Elimu, zitumike kwa ajili hiyo". Amesisitiza Mhe. Majaliwa.

Hata hivyo, Mkuu wa Mkoa wa Dodoma Mhe. Rosemary Senyamule, amesema Serikali ya awamu ya Sita imefanya mambo mengi kwenye sekta ya Elimu.

"Tunamshukuru Rais kwa kuinua sekta ya Elimu Dodoma kwani tumeimarika sana miaka hii 3. Dodoma imepanda ufaulu wa darasa la 7 na kuingia kumi Bora kitaifa 2022 kwa ufaulu kupanda kutoka 83% (2022) hadi 87%(2023). Tumeanza kuweka mikakati ya Mkoa kuhakikisha kila mwaka ufaulu unapanda.

Pia ametaja mafanikio yaliyopatikana kipindi hiki kuwa ni ujenzi wa miundombinu ya Elimu iliyogharimu shilingi Bilioni 92.4 , miradi ya BOOST shilingi Bilioni 10.6 iliyowezesha ujenzi wa Madarasa 196 na matundu ya vyoo 154. Fedha nyingine ni kutoka miradi ya SEQUIP, SWASH, TEA , EP4R na mingine mingi ambayo kwa pamoja imeboresha kiwango cha Elimu.

Mkutano wa wadau wa Elimu Mkoa wa Dodoma umefuatia matukio kadhaa yaliyofanyika kwa Juma zima ikiwemo kukimbia mchaka mchaka kwa wanafunzi, uzinduzi wa Bonanza la michezo, ugawaji wa mipira 1000 kwa shule za Msingi za Mkoa kutoka Shirikisho la michezo nchini (TFF).

Pia Juma hili limewezesha uzinduzi wa kwaya ya Mkoa wa Dodoma, midahalo kwa wanafunzi wa shule za Msingi na Sekondari na kufunga mafunzo kwa wahitimu wa skauti Mkoa.

Juma la wadau wa Elimu Mkoa wa Dodoma limefikia kilele chake likiongozwa na kauli mbiu ya "Uwajibikaji wangu ni msingi wa kuinua ubora wa Elimu na ufaulu Dodoma".

#Keroyakowajibuwangu

#Dodomafahariyawatanzania

ReplyForward Add reaction