DSW WATAMBULISHA MRADI WA REST III KWA HALMASHAURI ZA BAHI NA DODOMA JIJI

Imetumwa : November 8th, 2024

Na. Hellen M. Minja,          

       Habari – DODOMA RS

Shirika lisilo la Kiserikali la Afya na Maendeleo kwa vijana (DSW)Tanzania, leo Novemba 8, 2024, limefanya kikao kazi cha mapitio ya Mradi wa REST unaojishughulisha na kujenga uwezo kwa Taasisi zisizo za kiserikali kuimarisha mifumo ya kijamii ili iwe na tija kwenye program zinazohusu afya ya vijana.

Kikao kazi hicho kilichofanyika kwenye ukumbi wa Hoteli ya Zabibu Jijini Dodoma, kimeshirikisha mashirika ya DOYODO, FAEF na WOWAP, viongozi wa Sekretarieri ya Mkoa wa Dodoma, viongozi na wataalamu kutoka Halmashauri za Bahi, Dodoma Jiji pamoja na wadau mbalimbali.

Mkurugenzi wa DSW Tanzania Bw. Peter Oaga, amezungumzia namna Shirika lake linavyoendelea na utekelezaji wa Mradi huo katika awamu yake ya tatu.

“Kwenye mpango wa REST, tunaendelea na utekelezaji, huu ni mwaka wa tatu na tunaendelea kwa miaka mitatu mingine. Tunaona kuna mabadiliko makubwa kwenye hizi taasisi, pia tumeona kuna matokeo chanya kwenye jamii kwani taasisi hizi zina ushirikiano mzuri na Serikali”Amesema  Bw. Oaga

Akizungumza kwa niaba ya Sekretariet ya Mkoa wa Dodoma, Afisa Maendeleo ya Jamii Mkoa Bi Honorata Rwegasira, amesema Serikali ya Mkoa wa Dodoma ipo tayari kushirikiana na Shirika hilo katika utekelezaji wa mradi.

“Mlichokifanya na kukiongea hapa kiwe endelevu, sisi Serikali, tutaendelea kutoa ushirikiano katika maeneo yetu kwa kufanya ufuatiliaji kwani hiki kitu tunakifanya kwa mazuri na lengo ni kuisaidia jamii yetu, pale panapo hitajika ushauri wa kitaalamu msisite” Amesema Bi Rwegasira

Mradi wa REST unatekelezwa na DSW katika mikoa ya Arusha, Dodoma, Mwanza, Iringa na Mbeya kwa kushirikiana na Mashirika 11 ambapo kwa Dodoma unatekelezwa kwenye Halmashauri za Bahi na Dodoma Jiji kwa kushirikia na Mashirika ya DOYODO, FAEF na WOWAP.

#kurayakosautiyako              

#ujanjanikupigakura              

#dodomatukotayarikupigakura

#mtiwangubirthdayyangu