HALMASHAURI YA JIJI LA DODOMA YATOA MIKOPO YENYE THAMANI NYA TSH.1.38 BLN

Imetumwa : November 2nd, 2022

Halmashauri ya Jiji la Dodoma imekabidhi mfano wa hundi ya mikopo ya asilimia 10 kwa makundi maalum ya wanawake, vijana na watu wenye ulemavu kama sheria ya manunuzi ya Serikali inavyozitaka Halmashauri zote kufanya hivyo. Hafla hiyo imefanyika kwenye viwanja vya Chinangali Jijini Dodoma ambapo Mkuu wa Mkoa wa Dodoma Mhe. Rosemary Senyamule amehudhuria kama mgeni rasmi.

Katika hafla hiyo, Mkuu wa Mkoa amesema kuwa, hii ni mara ya kwanza kwa fedha nyingi kutolewa kwa wajasiriamali na amewapongeza Halmashauri ya Jiji la Dodoma kwa kutimiza na kutekeleza sheria hii

“Nitoe pongezi sana kwa Halmashauri ya Jiji la Dodoma kwani mumeonyesha njia kwa kuwa wa kwanza kutekeleza sheria hii. Halmashauri nyingine mujipange nanyi kuhakikisha munatekeleza hili. Hii ni dhamira ya dhati ya Mhe. Rais kuhakikisha wafanyabiashara wasio na uwezo wa kukopa kwenye Taasisi kubwa kama Benki, wanafaidika kwa mikopo hii nafuu na isiyo na riba kutoka Serikalini” RC Senyamule.

Mkuu wa Mkoa pia ametoa wito kwa wajasiriamali hao kutumia mikopo hiyo kwa uaminiifu ili waweze kuirudisha kwa wakati ili iwasaidie na wengine.

“Fedha hii sio zawadi, ni mkopo, inatakiwa kulipwa na isiporudishwa itapelekea kutungwa kwa sheria ngumu. Tukafanye kazi turudishe mikopo ili na wengine waweze kupata. Kila anayepewa fedha hizi aziheshimu, asizichezee” Ameongeza

Mkurugenzi wa Jiji la Dodoma Bw. Joseph Mafuru, akitoa mchanganuo wa fedha hiyo kiasi cha Shilingi Bilioni 1.38 zilizogawiwa kwa makundi maalum ya wanawake, vijana na watu wenye ulemavu.

“Katika kipindi cha Julai hadi Septemba, Halmashauri ya Jiji ilipokea maombi ya mikopo yenye thamani ya Shilingi Bilioni 5.83 kutoka katika vikundi 102 vilivyoidhinishwa. Mchanganuo wa mikopo hii ni kama ifuatavyo; vikundi 46 vya wanawake vimepata Shilingi Milioni 500, vikundi 33 vya vijana vimepata Shilingi Milioni 693 na vikundi 23 vya walemavu vimepata Shilingi Milioni 195.25 Mkopo huu umetoa Shilingi Milioni 467.48 kutoka kwenye mapato ya ndani ya Halmashauri na Shilingi Milioni 922.07 kutoka kwenye marejesho ya mikopo iliyotolewa awali” Bw. Mafuru

Hata hivyo, Naibu Meya wa Jiji la Dodoma, Bw. Jamal Yaredi amewasisitiza wafanyabiashara kuitumia mikopo hii kwa umakini ili waweze kuirudisha kwa wakati na iweze kuwasaidia wengine mwaka ujao. Pia amewaasa kuitumia vizuri ili iweze kuleta tija kwa biashara zao ziweze kukua na pamoja na kuwa msaada kwa familia zao.MWISHO