KAMATI YA BUNGE LAAC YATEMBELEA MIRADI WILAYA YA KONGWA

Imetumwa : March 14th, 2025

Na. Hellen M. Minja,

       Habari – DODOMA RS

Kamati ya kudumu ya Bunge ya Hesabu za Serikali za Mitaa (LAAC) ikiongozwa na Mwenyekiti wake Mhe. Halima Mdee, imetembelea miradi miwili (2) inayotekelezwa katika Halmashauri ya Wilaya ya Kongwa, Mkoa wa Dodoma Machi 14, 2025.

Akiikaribisha Kamati hiyo katika Mkoa wake ambayo pia ilianzia kwenye ofisi yake iliyopo Jengo la Mkapa Jijini humu, Mkuu wa Mkoa wa Dodoma Mhe. Rosemary Senyamule, amesema;

“Mkoa wa Dodoma umekua ukifanya vizuri katika miradi na vitu vingine hasa kupitia hoja za Mkaguzi wa Serikali, mara nyingi tumepata Hati safi japo haimaanishi hatuna kasoro, mambo mengi tumetakiwa kurekebisha ili tuwe safi zaidi ambayo ni kati ya haya mnayotaka kuyakagua kwani dhamira yetu ya kuhakikisha wanadodoma wanapata maendeleo ipo wazi”.

Awali, Mkurugenzi Mtendaji wa Halmashauri ya Kongwa Dkt. Omari Nkullo, alitoa taarifa ya miradi miwili itakayotembelewa kwa kusema kuwa mradi wa kwanza ni ujenzi wa Ofisi ya Halmashauri yake ambao unagaharimu kiasi cha shilingi Bilioni 3.5 na kwa sasa mradi umefikia 77% ya utekelezaji na unatarajiwa kukamilika 28/04/2025.

Katika Mradi wa pili ambao ni ujenzi wa miundombinu ya shule ya Sekondari Manungu iliyopo katika Kata ya Sejeli kupitia Mradi wa kuboresha Elimu ya Sekondari SEQUIP, mradi umekamilika na unafanya kazi ambapo jumla ya wanafunzi 304 wanasoma katika Shule hiyo,kati yao  Wavulana wakiwa ni 123 na Wasichana 181 kuanzia kidato cha 1 hadi 3.

Mradi umegharimu shilingi 544,225,626 ukijumuisha madarasa 8, jengo la Utawala, Maabara 3, Makataba 1, Chumba cha Kompyuta 1, matundu 10 ya vyoo, kichomea taka na tanki la ardhini kama ilivyoelekezwa na Serikali kuu. Mradi huu umesogeza huduma karibu na wananchi na kuwapunguzia mwendo wa Km 10 kila siku kufuata shule ya Sekondari eneo la Mbande.

Miradi yote imekaguliwa na Kamati hiyo na kupongezwa kwani inafanya vizuri huku wakimtaka Mkandarasi anayetekeleza Mradi wa jengo la Halmashauri kuongeza idadi ya wafanyakazi ili uweze kukamilika kwa wakati uliokusudiwa na kutoa huduma kwa wananchi.

Baadhi ya maelekezo yaliyotolewa na Kamati kwa Afisa Masuhuri baada ya ukaguzi ni pamoja na usimamizi madhubiuti kwenye miradi na kuhakikisha inakamilika, kasi ya ujenzi wa jengo la Halmashauri iongezeke na kuhakikisha linakamilika ifikapo 30, June 2025, majengo ya TEHAMA  na Maktaba katika shule ya Sekondari Manungu ambayo yamekamilika yapatiwe vifaa na kuanza kutumika kufikia 30 June, 2025.

Akihitimisha ziara hiyo, Mwenyekiti wa Kamati ya LAAC amesema; “Maelekezo ya Kamati ni sehemu ya Taarifa ambazo wakaguzi wenu watakuja kufuatilia utekelezaji wake hivyo, msipotekeleza haya, ofisi ya Katibu wetu itatoa taarifa hii ya maandishi kwa OR - TAMISEMI nao watawashushia. Ni muhimu kuyachukulia kwa uzito kwa sababu mukiyapuuza yatakuja kama sehemu ya maagizo ya Kamati yaliyopuuzwa na sisi tunakua wakali”. Mhe. Mdee.

#dodomafahariyawatanzania

#keroyakowajibuwangu

#mtiwangubirthdayyangu