KAMATI YA TATHMINI YA ATHARI ZA KODI NA TOZO YAFANYA UTAFITI DODOMA

Imetumwa : November 11th, 2024

Na. Hellen M. Minja,

       Habari – DODOMA RS

Kamati ya tathmini ya athari za kodi na tozo katika uendeshaji wa biashara nchini iliyoundwa na Wizara ya fedha ikiongozwa na Mamlaka ya Mapato Nchini (TRA), leo Novemba 11, 2024 imefanya utafiti katika Mkoa wa Dodoma kwa kuzungumza na wafanyabiashara mbalimbali.

Utafiti huo uliofanyika kwenye ukumbi wa ofisi ya Mkuu wa Mkoa, Jengo la Mkapa Jijini Dodoma, umelenga kuainisha aina za kodi na tozo mbalimbali za Serikali ambazo ni sumbufu au hazina uhusiano na malipo ya mfanyabiashara.

Akizungumza wakati wa utafiti huo, Mchumi Mkuu kutoka TRA Bw. Aulelus Mnyamba, amesema utafiti huo umetokana na malalamiko ya wafanyabiashara juu ya utitiri wa kodi/ushuru/tozo katika Taasisi za Serikali.

“Waziri wa fedha aliona ni vyema kuiagiza Mamlaka ya Mapato ishirikiane na taasisi nyingine za Serikali kuainisha ni tozo zipi mnafikiri hazina msingi wowote au zina muingiliano, Taasisi mbili au tatu zinatoza kitu hicho hicho au ni kodi ipi ifanyiwe marekebisho” Bw. Mnyamba

Utafiri huo ulikwenda sambamba na majadiliano na michango tofauti tofauti kutoka kwa wadau na wafanya biashara ambapo wameshauri ili Serikali kupunguza utitiri huo wa kodi na kumpatia unafuu mfanyabiashara hasa mdogo aweze kukua, ni vyema kodi zote zikawekwa pamoja ambapo pia  zitarahisisha ulipaji wake.

Katika hatua nyingine, Mkuu wa Wilaya ya Dodoma Mjini Mhe. Jabir Shekimweri, amesema kuwa taasisi za ukusanyaji kodi zinatakiwa kuwa na maono ya namna ya kukusanya kodi bila kumuathiri mfanyabiashara.

Naye, katibu tawala msaidizi, seksheni ya biashara na uwekezaji Mkoa wa Dodoma, Bibi Mwajabu Nyamkomola amesema kuwa kutokana na kuundwa kwa Kamati hiyo, sasa kilio na changamoto za muda mrefu kwa wafanyabiashara, huo ndio muarobaini wake kwani maoni ya timu hiyo yatakwenda kufanyiwa kazi.

#kurayakosautiyako              

#ujanjanikupigakura              

#dodomatukotayarikupigakura

#mtiwangubirthdayyangu