Kampeni ya kukijanisha Dodoma yashika kasi

Imetumwa : January 12th, 2023

Makamu wa Rais wa Jamhuri ya Muungano wa Tanzania Mhe. Dkt. Philip Isdor Mpango ameshiriki katika hafla ya upandaji miti iliyofanyika jijini Dodoma katika maeneo ya Ihumwa na Shule ya Msingi Msalato katika kuadhimisha  miaka 59 ya  Mapinduzi Zanzibar ambapo Mkoa wa Dodoma umeadhimisha kwa kuwa zoezi la upandaji miti.

Akizungumza na wananchi wa Mkoa wa Dodoma Mhe. Makamu wa Rais amesema  ili kuenzi Mapinduzi tukufu ya Zanzibar ni vema Taasisi zote na familia kuwa mfano katika upandaji miti ili kuyaenzi mazingira yetu tulioachiwa na wazazi wetu na kuendelee kudumisha ukijani ili Tanzania yetu iweze kuwa ya kijani.

"Ni vyema kupanda miti kila nyumba angalau miti mitatu, miwili ya matunda na mmoja wa kivuli ili tuendelee kudumisha ukijani wetu na tukiamua kushirikian tunaweza kutunza mazingira yetu na tusipande miti  ili mradi ni lazima tuzingatie upandaji wa miti rafiki kwenye  vyanzo vya maji  na miti ipandwe mbalimbali ili miti isidumae" Alisisitiza Dkt. Mpango.

Vile vile Mkuu wa Mkoa wa Dodoma Mhe. Rosemary Senyamule amesema ni lazima kujua ardhi ambayo itastawisha miti kwa kufanya tafiti za miti inayostawi katika maeneo husika ikiwa ni pamoja na kuweka ‘’kinga moto” kuzuia kuunga kwa miti pindi ajali ya moto ikitokea na kusisitiza umuhimu wa kuwa na tanki la maji ambalo litasaidia kipindi cha kiangazi.

"Wito ulitolewa kwa kila mwanafunzi kupanda miti ambao ulikuwa na kauli mbiu "SOMA NA MTI" miti imepandwa kwa wingi na maeneo bado ni mengi,  Leo tunapanda miti katika eneo hili la shule ya Msalato ikiwa ni kielelezo cha kuonesha kwamba maagizo yaliotolewa yanafanyiwa kazi. Mhe. Makamu wa Rais, Jiji la dodoma lina maeneo ya wazi 162 na katika maeneo 40 yamepata watu wa kutunza" Amesema Mhe. Senyamule

Nae Mkurugenzi wa Jiji la Dodoma Joseph Mafuru amesema katika kuadhimisha siku ya Mapinduzi Zanzibar, katika eneo la Ihumwa imepandwa miti 1800 na Shule ya Msalato imepandwa miti 1000. Maadhimisho ya miaka 59 ya Mapinduzi ya Zanzibar kwa Mkoa wa Dodoma yameongozwa na kaulimbiu isemayo "YAENZI MAPINDUZI YA ZANZIBAR TUNZA MAZINGIRA PANDA MTI KWANZA".