KASI YA UJENZI WA BARABARA KUBADILISHA MANDHARI YA JIJI LA DODOMA

Imetumwa : March 27th, 2024

Mkuu wa Mkoa wa Dodoma Mhe. Rosemary Senyamule, leo Machi 27, 2024 amefanya ziara ya kukagua miradi mitano ya barabara na daraja moja ambayo ipo chini ya Wakala wa Barabara Vijijini (TARURA) Mkoa wa Dodoma kwenye Halmashuri ya Wilaya ya Dodoma Mjini.

Ziara hiyo imebainisha maendeleo mazuri ya ujenzi wa miradi hiyo kwani yote ipo kwenye hatua za umaliziaji. Licha ya hali hiyo ya kuridhisha, Mkuu wa Mkoa ametoa maagizo ya kuhakikisha miradi hiyo inakamilika kwa wakati ili kuleta tija.

“Leo tumetembelea miradi 7 yenye jumla ya makadirio ya takribani KM 10 na barabara zote zipo kwenye viwango vizuri. Nimefurahi miradi hii imezingatia njia za watembea kwa miguu na taa kwani hizi ni muhimu kwa Makao Makuu”.

Hata hivyo, Mhe. Senyamule amesisitiza utunzaji wa mandhari ya Dodoma kwa kampeni ya kukijanisha Dodoma kwa kutoa maagizo kwa wakandarasi wote kupanda miti pembezoni mwa barabara pamoja na maelekezo mengine.

“Tulielekeza kila barabara iwe na mpango wa kupanda miti pembezoni kwani ni moja ya vipaumbele vya Mkoa. Hili lipewe uzito stahiki. Pia wakandarasi ambao walipoteza muda kipindi cha mvua, wafidie muda uliopotea pamoja na kusaidia kutengeneza maeneo ya barabara yaliyoharibiwa na mvua na kushindwa kupitika ili kuwasaidia wananchi” Mhe. Senyamule

Aidha, Mkuu wa Wilaya ya Dodoma Mjini Mhe. Jabir Shekimweri ambaye ameambatana na Mkuu wa MKoa kwenye ziara hiyo, ameishukuru Serikali ya awamu ya sita kwa kubadilisha muonekano wa Jiji la Dodoma kwa miradi hii ya barabara kwani imegharimu jumla ya shilingi Bilioni 11 na inakwenda kwa kasi ya kuridhisha.

Ziara hiyo imetembelea miradi ya barabara ya mzunguko Mlimwa C kwa Shs. Bilioni 2.7 kiwango cha lami yenye urefu wa Km 2.7, Barabara ya kuzunguka makazi ya Waziri Mkuu, barabara ya eneo la uwekezaji Nzuguni kwa Shs. Bilioni 1.5, Barabara ya Ujasi kwa shs. Bilioni 1.4, barabara ya Bima inayoelekea Mahakama Kuu pamoja na Daraja la Ng’ong’ona, kiwango cha mawe kwa Shs. Milioni 136.5