KATIBU TAWALA SINGIDA AKABIDHI OFISI KWA KATIBU TAWALA DODOMA

Imetumwa : March 23rd, 2023

Katibu Tawala Mkoa wa Singida Dkt. Fatuma Mganga, amekabidhi Ofisi kwa Katibu Tawala wa Mkoa wa Dodoma Bw. Ally Senga Gugu aliyeteuliwa hivi karibuni na Mhe. Rais Dkt. Samia Suluhu Hassan ambapo Dkt. Mganga amehamishwa kituo chake cha kazi.

Hafla ambayo imeshuhudiwa na Mkuu wa Mkoa wa Dodoma Mhe. Rosemary Senyamule kwenye ukumbi wa ofisi yake. Akizungumza mara baada ya makabidhiano hayo, Mhe. Senyamule amesisitiza juu ya majukumu ya msingi ya Katibu Tawala Mkoa pamoja na kugusia mambo mbalimbali ya kiutendaji yanayohusu ofisi yake;

"Katibu Tawala ndiye Msimamizi wa Usalama wa watumishi wote katika Mkoa hivyo tunatarajia usalama wetu utaendelea kuwa katika hali nzuri. Pia, Tumesitiza kwa Wakurugenzi wa Halmashauri kuwa kuvuka matumizi ya pesa za Serikali ni mwiko. Fedha za miradi zisivuke mwaka, ziende zikatumike kama ilivyokusudiwa. Nitoe shime kwa watumishi kuendelea kutoa huduma nzuri kwa wananchi. Nitoe mkazo pia katika kuimarisha usimamizi wa mazingira katika Mkoa wa Dodoma ili iendelee kung'aa kam ndoto za viongozi wetu zinavyotaka" Mhe. Senyamule

Akitoa neno la shukrani pamoja na kumuusia Katibu Tawala Mkoa wa Dodoma juu ya kutoa huduma kwa wahitaji, Katibu Tawala Mkoa wa Singida amesema; "Namshukuru Mhe. Rais kwa kunipa tena nafasi nyingine ya kuwa Katibu Tawala kwani nimeonekana ninafaa kuendelea na nafasi yangu nikiwa Singida. Ofisi ya Katibu Tawala niliyoipata niliitumia kuwa faraja kwa watu kwani hapa ni Makao Makuu na watu wana shida nyingi, unapaswa kutumia mali yako kusaidia watu. Wakurugenzi Mimi nilikua Mtendaji na wakati mwingine niliwasukuma sana kwa lengo la Mkoa wetu uwe bora" Amesema Dkt. Mganga

Katibu Tawala Mkoa wa Dodoma Bw. Ally Gugu, naye akapata wasaa wa kusema machache wakati wa hafla hiyo; "Nashukuru sana kwa kunikabidhi kijiti hiki, nami nitatumia muda wangu kuhakikisha umoja huu ulioanza kuunganisha, unaendelea na kuimarisha mahusiano yetu na Taasisi mbalimbali. Tunayo fursa kubwa ya kuvutia wawekezaji na si kwenye kilimo na ufugaji tu, bali na sekta nyingine. Tushirikiane Mkoa wetu utoke kwenye nafasi za chini za uchangiaji wa pato la Taifa na kuwa kwenye nafasi juu" Amesema Bw. Gugu.

MWISHO