KONDOA YAJIPAMBANUA KATIKA SEKTA YA AFYA NA KILIMO

Imetumwa : May 4th, 2023

Ziara ya Katibu Tawala Mkoa wa Dodoma Bw. Ally Gugu kukagua utekelezaji wa miradi ya maendeleo leo tarehe 4 Mei 2023 imeingia siku ya pili ambapo ametembelea Halmashauri ya Wilaya ya Kondoa na kuangazia miradi katika Sekta ya Afya, Elimu na Utawala.

Akiwa Kondoa Bw. Gugu ametembelea miradi saba ikiwa ni pamoja na ujenzi wa Jengo la Halmashauri hiyo, nyumba ya Mkurugenzi na ujenzi wa nyumba tatu za watumishi. Miradi mingine aliyotembelea ni miradi katika sekta ya Afya  na Elimu.

Katika ziara yake Bw. Gugu ametoa rai kwa Mkurugenzi wa Halmashauri ya Wilaya ya Kondoa Bw. Mustapha Semwaiko Yussuf kuhakikisha miradi yote inayoendelea kutekelezwa katika hatua mbalimbali iweze kukamilika ifikapo tarehe 31 Mei 2023.

Serikali imetoa shilingi Bilioni 1.2 kuwezesha ujenzi wa Ofisi na Makao Makuu ya Halmashauri Bukulu na Ujenzi wa Nyumba 3 za Wakuu wa Idara.  Aidha katika sekta ya Afya Bw. Gugu amepongeza hatua nzuri ya maendeleo ya ujenzi wa majengo manne katika Hospitali ya Wilaya ya Kondoa ambayo ni Wodi ya wanawake, wodi ya wanaume, wodi ya Watoto na jengo la kuhifadhi maiti, ambavyo gharama yake ni milioni 750 kutoka Serikali kuu.

Aidha, Bw. Gugu pia amepata fursa ya kutembelea mradi wa ujenzi wa Computer Cluster na ujenzi wa madarasa matatu katika Shule ya Msingi Isabe ambavyo gharama yake ni milioni 80.

Kufuatia ukaguzi huo wa miradi ya sekta ya elimu na afya, Bw. Gugu ametoa maelekezo ya kuhakikisha kuwa miradi yote inakamilika kwa muda uliopangwa na kwa ubora wa hali ya juu.

“Niwahikikishie kuwa tutarudi tena, haya maelekezo tuliyowapa yazingatieni na tutakaporejea tupate taarifa ya utekelezaji wake kwa vitendo” Gugu amesisitiza

Pia, Bw. Gugu amepata fursa ya kuzungumza na watumishi wa Halmashauri hiyo na kuwaasa kufuata misingi na taratibu za utumishi wa umma na kusisitiza kuacha kufanya kazi kwa mazoea.

Awali, Mkurugenzi wa Halmashauri ya Wilaya ya Kondoa Bw. Mustapha Semwaiko Yussuf amemuhakikishia Katibu Tawala wa Mkoa wa Dodoma Bw. Ally Gugu kuwa maelekezo yake yanatekekelezwa kwa vitendo.