KUKOSEKANA KWA USAWA, CHANZO CHA MAAMBUKIZI VVU

Imetumwa : March 1st, 2023

Waziri wa Nchi, Ofisi ya Waziri Mkuu, Sera, Bunge na Uratibu Mhe. George Simbachawene (MB) amesema kukosekana kwa usawa ni chanzo kikuu cha maambukizi ya Virusi vya Ukimwi. Simbachawene amesema hayo leo 01 Machi 2023 katika hotuba yake iliyosomwa kwa niaba yake na Mkuu wa Mkoa wa Dodoma Mhe. Rosemary Senyamule katika Maadhimisho ya Siku ya Kimataifa ya kupinga ubaguzi Duniani ambayo huadhimishwa kila mwaka tarehe 1 Machi ambapo mwaka huu yamefanyika Mkoa wa Dodoma kwenye ukumbi wa Hoteli ya Morena.

Amesema, Tanzania inaungana na Dunia kuadhimisha siku hii kwani ubaguzi katika jamii unasababisha kukosekana kwa usawa, unyanyasaji na ubaguzi vinaongeza maambukizi ya Virusi vya Ukimwi na kusisitiza kuwa kuna uhusiano mkubwa kati ya ubaguzi na unyanyasaji wa kijinsia. Wanawake walio katika ubaguzi wapo katika hatari kubwa ya kupata maambukizi ya VVU. Amesema Mhe. Simbachawene.

Simbachawene ametoa Rai kwa viongozi wa dini kuisaidia Serikali kuhubiri amani na upendo miongoni mwa jamii kwani wao ni nguzo muhimu inayoweza kukomesha ubaguzi na kupelekea kufikiwa kwa malengo ya Serikali ya kutokomeza unyanyapaa, unyanyasaji na ubaguzi ifikapo mwaka 2030.

Miongoni mwa wadau wakubwa wa siku hii ni Tume ya kudhibiti Ukimwi Tanzania (TACAIDS) ambapo Kaimu Mkurugenzi wake Bw. Jumanne Isango amesema

“Unyanyapaa bado ni kikwazo ndani ya jamii na tunatarajia ifikapo mwaka 2030 kama yalivyo malengo ya Kimataifa, pasiwepo na vifo vitokanavyo na Ukimwi, pasiwe na ubaguzi wala unyanyapaa kwa waathirika wa Virusi vya Ukimwi. Sauti hii tunataka ifike mbali ili kuweza kumaliza kabisa tatizo hili” Amesema Bw. Isango

Hata hivyo, Bi Grace Mallya ambaye ni mwakilishi wa Shirika la Kimataifa la kupambana na Ukimwi Duniani (UNAIDS), ambao pia ni wadau waliofanikisha maadhimisho haya amesema mwaka 2021 ulianzishwa mpango wa kupinga Ukimwi ulioainisha mikakati ya kuondoa Ukimwi Duniani na Tanzania ni miongoni mwa washirika wa mpango huo kwani tafiti zinaonyesha nchi za Kusini mwa Jangwa la Sahara zina maambukizi makubwa ya VVU hasa kwa vijana wenye umri wa miaka 14 hadi 21 na wengi hawatumii dawa za kufubaza virusi hivyo huku changamoto kubwa ikitajwa kuwa ni ubaguzi.

Siku ya Kimataifa ya kupambana na ubaguzi Duniani ilianza kuadhimishwa nchini Tanzania mwaka 2014 ikiwa na lengo kuu la kupinga ubaguzi kwa watu wenye VVU na makundi maalumu kwenye jamii na huandaliwa na Ofisi ya Waziri Mkuu ikishirikiana na wadau mbalimbali kama vile UNAIDS, TACAIDS, PASADA, Save the Children, Baraza la watu wanaoishi na VVU (NACOPHA), watu wenye ulemavu na makundi mengine mengi katika jamii na kauli mbiu ya mwaka huu ni “Okoa maisha, usibague”

MWISHO