Maadhimisho ya Sherehe za Miaka 53 ya Muungano wa Tanganyika na Zanzibar yafana sana Mjini Dodoma Aprili 26, 2017

Imetumwa : April 26th, 2017

DODOMA

Rais wa Jamhuri ya Muungano wa Tanzania Mheshimiwa Dkt. John Pombe Magufuli , leo tarehe 26 Aprili 2017, ameongoza maelfu ya Watanzania katika sherehe za miaka 53 ya Muungano wa Tanganyika na Zanzibar zilizofanyika katika Uwanja wa Jamhuri Mjini Dodoma.

Akizungumza mara baada ya kukagua gwaride la vikosi vya Ulinzi na usalama lililoandaliwa kwa heshima yake, Rais Magufuli amewahakikisia Watanzania kuwa yeye na Rais wa Zanzibar Dkt. Ali Mohamed Shein wataendelea kuulinda Muungano kwa nguvu zao zote na kwamba atakayejaribu kuuvunja atavunjika yeye.

“Muungano ndio silaha yetu, Ni nguvu yetu, Mimi na mwenzangu Dkt. Shein tutaulinda Muungano kwa nguvu zote, Yeyote atakayejaribu kuuvunja atavunjika yeye” amesema Rais Magufuli.

Aidha Dkt. Magufuli amewataka Watanzania kuendelea kudumisha amani iliyopo nchini kwani amani ndio chachu ya maendeleo yanayopatikana nchini.

Rais Magufuli amesema Tanzania imeweza kufikisha miaka 53 ya Muungano wa Tanzania na Zanzibar kwa sababu ya amani iliyopo nchini iliyowezesha kupatikana mafanikio makubwa ikiwa ni pamoja na kuunganisha mataifa yetu mawili na kuunda Taifa moja lenye nguvu.

Aidha amesema Muungano wa Tanganyika na Zanzibar umewezesha kupatikana mafanikio makubwa katika nyanja za kiuchumi, kisiasa na kijamii.

Mhe. Rais ametaja mafanikio mengine yaliyopatikana kutokana na Muungano ni kukua kwa uchumi na Kukabiliana na matatizo ya umaskini na ukosefu wa ajira, kuimarisha miundombinu ya usafiri wa anga, majini, reli na nchi kavu.

Aidha, Muungano umeimarisha na kuboresha upatikanaji wa huduma za jamii ikiwa ni pamoja na kuongezeka kwa idadi ya shule na hospitali pamoja na kukua kwa demokrasia nchini.

Kwa mara ya kwanza katika historia ya Muungano wa Tanganyika na Zanziba Maadhimisho ya Sherehe za Muungano zinafanyika Mkoani Dodoma Makao Makuu ya Serikali ikiwa ni ishara tosha kuwa Serikali ya Awamu ya Tano inayoongozwa na Chama cha Mapinduzi imedhamiria kwa dhati kuhakikisha Makao Makuu ya Serikali yanakuwa Dodoma.

“Niwahakikishie wana Dodoma na Watanzania kwa ujumla kwamba Serikali sasa tumefika Dodoma na hatutarudi tena, na kama tulivyoahidi mwaka 2020 Serikali yote itakuwa imehamia hapa” amesema Rais Magufuli.

Sherehe za miaka 53 ya Muungano zimehudhuria na Viongozi mbalimbali ikiwa ni pamoja na wajane wa Viongozi Waasisi wa Muungano mke wa hayati Mwalimu Julius Nyerere Mama Maria Nyerere na hayati Abeid Aman Karume, Mama Shadya Karume, Makamu wa Rais Mama Samia Suluhu Hassan, Waziri Mkuu Kassim Majaliwa na Viongozi wa Chama na Serikali.

Kauli mbiu ya Sherehe za Muungano mwaka huu ni “Miaka 53 ya Muungano, Tuulinde na Kuuimarisha, Tupige Vita Dawa za Kulevya na Kufanya Kazi kwa Bidii”.