MAFUNZO YA MAADILI YATOLEWA KWA VIONGOZI WA UMMA

Imetumwa : February 8th, 2023

Mkuu wa Mkoa wa Dodoma Mhe. Rosemary Senyamule amefungua mafunzo ya maadili kwa viongozi wapya wa umma wa Mkoa wa Dodoma yaliyofanyika katika Ukumbi mdogo wa mikutano wa Jakaya Kikwete ambapo mafunzo hayo yanafanyika kwa siku moja.

Mhe. Senyamule amesema sekretarieti ya maadili ya viongozi wa umma ni Idara ya Serikali inayojitegemea ambayo imeanzishwa kwa mujibu wa ibara ya 132 ya katiba ya Jamhuri ya Muungano wa Tanzania ikiwa na jukumu la kuchunguza tabia na mwenendo wa kiongozi yeyote wa Umma kwa madhumuni ya kuhakikisha masharti ya sheria ya maadili ya viongozi yanazingatiwa na viongozi husika.

‘’Yanapozungumzwa maadili ya viongozi wa umma baadhi ya watu hufikiria kazi ya viongozi ni kutoa tamko la rasilimali na madeni tu, la hasha, maadili ya uongozi yanahusisha pia misingi mingine muhimu kama ilivyo kwa utoaji wa tamko la rasilimali na madeni na yote hiyo ni pamoja na uadilifu, uwajibikaji, uwazi, kuheshimu sheria, kujali watu wengine, kujizuia na tamaa, kuepuka upendeleo na mgongano wa maslahi”Amesema Mhe. Senyamule

Vilevile Mhe, Senyamule amesisitiza viongozi wa Umma kuzingatia suala la maadili

‘’jitihada za kufanikisha mafunzo haya ni kielelezo cha dhamira ya dhati ya Serikali ya Awamu ya sita ya kuhakikisha kuwa suala la maadili kwa viongozi wa umma nchini linaeleweka sawasawa na kuchangia katika kukuza utawala bora nchini, kwa kuzingatia kwamba kutokujua sheria ya maadili si kinga ya kufanya makosa ni vyema kutoa elimu kuhusu maadili kwa viongozi ili wassijikute kwenye mtego wa kuvunja sheria’’ Mhe. Senyamule

Kwa upande wake Katibu wa Ukuzaji Maadili Ofisi ya Rais Sekretarieti ya Maadili ya viongozi wa Umma Bw. Waziri Kipacha amesema mojawapo ya majukumu ya Sekretarieti hiyo ni pamoja na kutoa elimu kwa viongozi hao na kupokea matamko yao kuhusu rasilimali, maslahi na madeni yanayopaswa kutolewa kwa mujibu wa sheria ya maadili ya viongozi wa Umma.

‘’Katika mafunzo haya mada kuhusu sheria ya maadili ya viongozi wa umma, uwajibikaji wa pamoja katika sekta ya Umma, kanuni za udhibiti wa mgongano wa maslahi na kanuni za ahadi ya uadilifu na utoaji wa tamko la rasilimali na madeni zitatolewa na wakufunzi wetu mahiri na wenye uzoefu. Ni matarajio yetu kuwa mafunzo haya yatawaongezea uelewa viongozi wetu kuhusu misingi ya maadili, uwajibikaji wa pamoja, kuepuka migongano ya maslahi, kuzingatia ahadi ya uadilifu na ujazaji wa tamko la rasilimali na madeni’’Amesema Bw. Kipacha

MWISHO