Mafunzo ya Utengenezaji Tovuti za Mikoa na Halmashauri za Wilaya

Imetumwa : March 20th, 2017

Katibu Tawala wa Mkoa wa Dodoma Ndg. Rehema Madenge leo Machi 20, 2017 amefungua rasmi mkutano wa mafunzo ya Utengenezaji Tovuti za Mikoa na Halmashauri za Wilaya uliohusisha Mikoa saba na Halmashauri zake ikiwa ni Mkoa wa Dar es salaam, Pwani, Iringa, Singida, Manyara, Geita na wenyeji Dodoma.

Mafunzo hayo pia yanafanyika mikoa yote ya Tanzania Bara katika mikoa ya kanda mbalimbali ikiwa ni pamoja na kituo cha Mkoa wa Mbeya, Morogoro, Mtwara, Kigoma na tayari kanda ya ziwa afunzo yalishafanyika kwenye Mkoa wa Mwanza.

Katika ufunguzi wa Mafunzo hayo, Katibu Tawala Ndg Rehema Madenge amewataka Maafisa Habari wa Serikali kuhakikisha wanatoa taarifa sahihi na kwa wakati ili jamii izipate na kuzifanyia kazi  na kuongeza kuwa hiyo itaepusha taarifa zisizo za ukweli kusambaa kwa jamii.

Ndg. Madenge ameongeza kuwa, matarajio ya Serikali baada ya kukamilika kwa mafunzo hayo yanayotarajiwa kufikia mwisho Machi 27, 2017 ni kuona Mikoa yote na Halmashauri zote  nchini zitakuwa na tovuti zake na hiyo itasaidia kuiunganisha Serikali na jamii itapata taarifa za Serikali kwa ukaribu na urahisi zaidi.

Vilevile amebainisha kuwa Serikali inatarajia baada ya mafunzo hayo, Maafisa Habari wa Serikali za Mikoa na Halmashauri za Wilaya wataweza kufanya kazi zao kwa zaidi na kwa njia itayovutia jamii kusoma habari hizo.

Pia amesema kuwa Serikali inatambua kwa muda mrefu kumekuwa na changamoto ya utayarishaji na uendeshaji wa tovuti na utoaji wa taarifa kwa wakati kwa baadhi ya Mikoa na Halmashauri za Wilaya.

"Jamii inahaki ya kupata taarifa za shughuli za Serikali na haki hiyo ni kwa mujibu wa Katiba ya Jamhuri ya Muungano wa Tanzania" alibainisha Ndg. Madenge na kuongeza kuwa ni vema Maafisa Habari wa Serikali wakawa wanahakiki taarifa wanazozitoa kwa Umma kabla hawajazirusha hewani.

 Ndg. Madenge amewataka Maafisa Habari wa Serikali kutambua kuwa kukamilisha kutengeneza tovuti za Serikali za Mikoa na Halmashauri za Wilaya zitaongeza wigo wa dhana ya uwazi na uwajibikaji kwa wananchi wake kwa kuwajulisha mambo yote muhimu yanayotekelezwa na Serikali na hivyo amewataka kuhakikisha tovuti hizo zinawekwa taarifa mpya kila wakati na kumaliza utamaduni wa baadhi ya tovuti kuwa na taarifa za muda mrefu na zilizo pitwa na wakati. Baadhi ya Tovuti zina taarifa za mwaka jana hadi mwaka juzi.

Akizungumzia Malengo ya Serikali ya Awamu ya Tano, amesema kuwa Serikali inalenga kuifanya nchi yetu kuwa ya viwanda na uchumi wa kati na sekta za kilimo na mifugo zikiwa na mchango mkubwa  katika kuilisha sekta ya viwanda hivyo kupitia tovuti hizo za serikali kuongeza kasi ya upashanaji habari za kilimo na mifugo.

Mafunzo hayo yatakayokamilika Machi 27, 2017, yanaendeshwa na kusimamiwa na Taasisi ya kuimarisha mifumo ya Umma (PS3) kwa kushirikiana na Ofisi ya Rais TAMISEMI na Wakala ya Serikali Mtandao.

Imetolewa na:

Jeremia Mwakyoma

AFISA HABARI WA MKOA

OFISI YA MKUU WA MKOA WA DODOMA

Machi 20, 2017