Makabidhiano Rasmi ya Ofisi kati ya Mkuu Mpya wa Mkoa wa Dodoma Mhe. Dkt. Bilinith Saatano Mahenge na aliyekuwa Mkuu wa Mkoa huo Ndg. Jordan Rugimbana Oktoba 30, 2017

Imetumwa : October 30th, 2017

Aliyekuwa Mkuu wa Mkoa wa Dodoma Ndg. Jordan Rugimbana, Leo Oktoba 30, 2017 amemkabidhi rasmi ofisi Mkuu mpya wa Mkoa wa Dodoma Mhe. Dkt. Bilinith Mahenge mbele ya Wajumbe wa Kamati ya Ulinzi na Usalama ya Mkoa wa Dodoma, Wakuu wa Wilaya za Mkoa wa Dodoma, Viongozi wa CCM na Waandishi wa Habari.

Akitoa salamu zake wakati wa kukabidhi ofisi, Ndg. Rugimbana amemshukuru Mheshimiwa Rais Dkt. John Pombe Magufuli kwa Imani kubwa aliyokuwa nayo kwake tangu alipomteuwa kuwa Mkuu wa Mkoa wa Dodoma hadi alipoamua kufanya mabadiliko kwenye safu ya Wakuu wa Mikoa Oktoba 26, 2017 na kuahidi kuwa akiwa uraiani ataendelea kulitumikia Taifa na kuiunga mkono Serikali, lengo likiwa kuhakikisha azma ya Serikali ya awamu ya tano inatimia.

“Pamoja na mabadiliko haya ya Uongozi, daima nitaendelea kukienzi na kukiishi kiapo cha uongozi nilichokula. Aidha, nitaendelea kulitumikia Taifa kwa nguvu zangu zote na kuiunga mkono Serikali ya Awamu ya Tano ya Jamhuri ya Muungano wa Tanzania, inayoongozwa na Rais Dkt. John Pombe Magufuli” alisisitiza Ndg. Rugimbana.

Pia alishukuru kwa ushirikiano alioupata kutoka kwa taasisi na wadau mbalimbali Mkoani Dodoma wakati wote wa uongozi wake na kuomba ushirikiano huohuo uendelezwe kwa Mkuu mpya wa Mkoa wa Dodoma Mheshimiwa Dkt. Mahenge. Pamoja na salamu hizo, Ndg. Rugimbana alimkabidhi Dkt. Mahenge taarifa rasmi ya Makabidhiano yenye Mikakati ya shughuli mbalimbali za maendeleo kwenye Mkoa iliyojumuisha masuala mbalimbali kama Ujio wa Serikali Mkoani Dodoma, Kilimo, Viwanda, Biashara, Uwekezaji na huduma za jamii.

Kwa upande wake Mkuu mpya wa Mkoa wa Dodoma Mheshimiwa Dkt. Bilinith Mahenge amesema akiwa Mkoani Dodoma atahakikisha azma ya Rais Magufuli ya Tanzania ya Viwanda inafanikiwa, vilevile atahakikisha anasimamia na kufuatilia shughuli zote za maendeleo kwenye Mkoa, ameomba ushirikiano mkubwa kutoka kwa viongozi mbalimbali Mkoani Dodoma, wadau na wananchi wote ili kuwa timu moja katika kujiletea maendeleo na ametaka kupitia ushirikiano huo kuhakikisha kero na changamoto za wananchi zinamalizwa.

Dkt. Mahenge mara baada ya makabidhiano ya Ofisi, alianza rasmi kazi mara moja kwa kufanya kikao cha kazi na wakuu wote wa wilaya za Mkoa wa Dodoma.