MASOMO YA AMALI YATAWAWEZESHA VIJANA KUTOKA NA UJUZI-RC SENYAMULE

Imetumwa : March 25th, 2025

Na. Hellen M. Minja,

       Habari – DODOMA RS

Serikali ya awamu ya sita imeingiza Mtaala mpya wa elimu unaohusisha masomo ya ufundi (Amali) ili kuwawezesha vijana wanaomaliza kiwango fulani cha elimu kutoka na ujuzi ambao utawawezesha kujiajiri wenyewe pasi na kutegemea kuajiriwa.

Mkuu wa Mkoa wa Dodoma Mhe. Rosemary Senyamule, ameyasema hayo alipokua kwenye hafla ya uzinduzi wa bweni na jengo la michezo kwenye shule ya Wavulana ya ‘The Sisters of Mary Boystown’ iliyopo eneo la Kikombo, Jijini Dodoma Machi 25, 2025 ambayo inafundisha masomo ya kawaida na  Amali upande wa TEHAMA.

“Hapa mnakwenda sambamba na dhamira ya Serikali ya kutilia mkazo masuala ya ufundi. Wote mnajua kuwa Serikali hivi karibuni ilizindua Sera mpya ya elimu pamoja na mtaala ambapo masomo ya ufundi yameingizwa kwa lengo la kuwawezesha vijana kiwango fulani cha elimu waweze kutoka na ujuzi” Mhe. Senyamule

Kadhalika, akizungumza kwa niaba ya Waziri wa Elimu Prof. Adolf Mkenda, Kamishna kutoka Wizara hiyo Bw. Abdul Maulid amesema Wizara yake imefanya maboresho ambayo tayari yameshafanywa na shule hiyo ambayo ni uwepo wa mikondo miwili, ya kawaida na ile ya Amali hivyo amewaasa wanafunzi hao kuleta maendeleo kwa jamii kutokana na elimu wanayoipata shuleni hapo.

Askofu Mkuu Jimbo Katoliki Mkoa wa Dodoma Beatus Kinyaiya, amewaasa wanafunzi hao kuzingatia mafunzo ya Amali wanayoyapata shuleni hapo huku akiishauri Serikali kutafuta namna bora itakayofanya mtaala huo mpya kutengeneza vijana wabunifu na si kujaza wataalamu ambao hawatakua na tija kwenye jamii.

Aidha, Kiongozi wa Masista katika shule hiyo Bi. Elena G. Belarmino amesema kwa msaada wa Askofu Kinyaiya, walipata eneo hilo na kujenga shule mwaka 2022 ambapo sasa ni Mji wa Wavulana wanaofikia 370 kutoka katika familia duni Nchi nzima wanaopata elimu shuleni hapo.

Shule ya ‘The Sisters of Mary Boystown’ imeasisiwa na Bw. Aloysius Schwartz, raia wa Korea ambapo inasimamiwa na Masista kutoka Nchini humo na Ufilipino na kwa sasa inatoa elimu bure kwa wavulana hao kuanzia kidato cha kwanza mpaka cha sita kwa kupata msaada kutoka kwa wafadhili wa nchi mbalimbali zikiwemo Ujerumani na Marekani.

#dodomafahariyawatanzania

#keroyakowajibuwangu#mtiwangubirthdayyangu