Mhe. Mtaka Awataka Wananchi Wa Dodoma na Mikoa Jirani Kushiriki Kikamilifu Sherehe za Kumbukumbu ya Mashujaa

Imetumwa : July 21st, 2022

Mkuu wa Mkoa wa Dodoma,Mhe. Anthony Mtaka amewataka Wananchi wa Mkoa wa Dodoma kushiriki  kwa ukamilifu sherehe za Kumbukumbu za Mashujaa Duniani ambazo zitafanyika Kitaifa Mkoani humo. Mhe. Mtaka ameyasema hayo leo hii wakati wa Mkutano na Waandishi wakati akikagua  maandalizi ya viwanja vya Mashujaa jijini Dodoma.

Akiendelea na ukaguzi huko Mhe.Mtaka ameonyesha kuridhishwa na Maandilizi yanayoendelea katika viwanja hivyo na kuwataarifu waandishi wa habari pamoja na Wananchi wa  Dodoma kuhusu uwashwaji wa Mwenge wa Mashujaa  ambao utawashwa na Mkuu wa Mkoa wa Dodoma  siku ya  24/7/2022  saa 6 usiku katika viwanja hivyo. Sanjali na hayo Mkuu wa Mkoa amewaeleza waandishi hao kuwa Mwenge huo wa Mashujaa utazimwa 25/7/2022 saa 6 usiku na Meya wa jiji la Dodoma Prof Davis Mwamfupe. “Matukio yote hayo yatakuwa Mubashara hivyo Wanadodoma na majirani zetu mfike ili tushiriki pamoja”. Amesisitiza Mhe. Mtaka   

Aidha Mhe. Mtaka ameeleza kuwa kutokana na umuhimu wa eneo hilo, Mkoa kwa kushirikiana na Jiji la Dodoma watahakikisha Eneo hilo linawekwa na kutunzwa vizuri kwa ajili ya kuwa  kivutio kwa watanzania,“tutakachofanya ni kupaongeza hadhi na kuwa eneo la kivutio litakalowavutia watanzania na wageni kuja kupatembelea, lazima Mnara na Eneo hili uwe tofauti na miara  ile iliyopo mikoa mingine.

Mkuu wa Mkoa amemtaja Rais wa Jamhuri ya  Muungano  wa Tanzania Mhe. Samia Suluhu Kuwa mgeni Rasmi katika sherehe za kumbukumbu za Mashuja. Aidha Mhe. Mtaka amemshukuru sana Mhe. Rais kwa kuupa heshima mkoa wa Dodoma kwani pamoja na mikoa mingi kuwa na minara ya Mashujaa, Dodoma ndipo mahala Sherehe hizo zitafanyika Kitaifa.“Hivyo ni vyema wanadodoma mkatambua fursa hii adhimu na kushiriki kwa wingi wenu. Nichukue fursa hii kuikaribisha mikoa jirani nanyi mfike kwa ajili ya kuwaenzi mashujaa wetu waliotusaidia kupata uhuru”. Amesisitiza Mhe. Mtaka.

MWISHO