MHE. RAIS KUZINDUA TRENI YA MWENDOKASI AGOSTI MOSI

Imetumwa : July 30th, 2024

Mkuu wa Mkoa wa Dodoma Mhe. Rosemary Senyamule amesema uwepo wa Treni ya  Mwendokasi  (SGR) unaongeza fursa ya biashara kwa wakazi wa Dodoma na Mikoa Jirani.

Hayo yamesemwa na Mhe. Senyamule mapema hii Leo Julai 30,2024 katika viwanja vya Makao Makuu ya stesheni hiyo wakati akizungumza na waandishi wa habari kwa lengo la kuwakaribisha wananchi kushiriki uzinduzi rasmi wa Treni hiyo utakaofanyika Agosti mosi na Mhe.Dkt Samia Suluhu Hassan Rais wa Jamhuri ya Muungano wa Tanzania.

" Hapa kwenye stesheni kuna maeneo ya kufanyia Biashara na hii ni fursa kwa wakazi wa Dodoma kufanya biashara katika maduka haya ili wasafiri wataokuwa wanasubiri treni waweze kupata huduma mbalimbali zinazopatikana hapa, na sisi Mkoa wa Dodoma tutakuwa na duka moja ambalo litakuwa linauza bidhaa zinazotokana na mazao yanalimwa hapa kama dhabibu, alizeti na karanga ",amesema Senyamule

Aidha Mhe. Senyamule ameweka bayana kuwa uwepo wa Bandari kavu ya Ihumwa itawarahisishia wafanyabiashara kupokea mizigo Yao Kwa wakati na gharama nafuu ukilinganisha na usafiri mwingine.

" Kupitia treni hii mji wetu unaenda kuwa 'logistics hub' kwa kuwa tunazo barabara za mzunguko kwahiyo mizigo kutoka Nchi mbalimbali kwenye meli na ikifika Bandarini itapakiwa kwenye treni na  itashushwa Kwenye bandari kavu ya Ihumwa na Mikoa jirani itachukua mizigo Yao kutokea hapa jambo ambalo litaongeza ukuaji wa Dodoma kama makao Makuu ya Nchi na biashara zitakua", amebainisha Senyamule

Uzinduzi rasmi wa Treni hiyo unatarajiwa  kufanyika katika viwanja vya Stesheni ya treni hiyo vilivyopo Mkonze Jijini Dodoma ambapo Mgeni rasmi Mhe. Rais atawasili katika viwanja hivyo kwa treni hiyo ya kisasa kutokea Jiji la Dar es salaam hadi hapa Jijini Dodoma.

&&&

#dodomafahariyawatanzania

#keroyakowajibuwangu