MHE. SENYAMULE MGENI RASMI MKESHA WA MWAKA MPYA

Imetumwa : December 29th, 2022

Mwenyekiti wa Kamati ya Mkesha Mkubwa Kitaifa Askofu Godfrey Emmanuel Malassy ametangaza rasmi Mkesha Maalumu wa Kitaifa kwa ajili ya kuliombea Taifa unaofanyika kila mwaka tarehe 31 Desemba na mwaka huu utafanyika katika viwanja vya Nyerere Square Jijini Dodoma kuanzia saa 12:00 jioni.

Akizungumza na waandishi wa Habari hii leo Mwenyekiti wa Kamati ya Maandalizi Askofu Godfrey Emmanuel Mallasy amesema Mgeni rasmi katika mkesha anatarajiwa kuwa Mkuu wa Mkoa wa Dodoma Mhe. Rosemary Senyamule ambaye atamwakilisha Rais wa Jamhuri ya Muungano wa Tanzania, Dkt. Samia Suluhu Hassan na kuhudhuriwa na viongozi mbalimbali waliopo Dodoma kwa lengo la kuliombea Taifa.

“Watanzania wote mnakaribishwa katika mkesha lengo kuu la mkesha ni kuliombea Taifa, Viongozi wetu watashiriki na katika hali yoyote Mungu analiangalia taifa kutokana na maono yake, dhumuni la mkesha ni kujielekeza kwa Mungu” Alisisitiza Askofu Mallasy.

“Kila mmoja angependa ajue anamalizaje mwaka na mwaka unaofuata atauanzaje, tutapata fursa au kibali kutoka kwa Mungu kuweza kuliweka taifa letu mbele zake, tunapomaliza mwaka na kuingia mwaka mwingine. Maombi haya yalianza mwaka 1997 Dar es Salaam” amesema Askofu Mallasy

Aidha, Mkesha wa mwaka huu utarajiwa kufanyika katika mikoa 6 tofauti ambayo ni Dodoma, Kilimanjaro, Iringa, Arusha, Morogoro na Singida. Huu ni mwaka wa tisa mkesha huu unaandaliwa na unafanyika pia visiwa vya Zanzibar ili kuunganisha nchi na huu ni mwaka wa 2 kufanyika katika Mkoa wa Dodoma.

Kaulimbiu ya mkesha huo kila mwaka ni “Amani,Utulivu na Ustawi, Nchi nzima sauti Moja” Mkesha wa kuliombea Taifa ulianza kufanyika mwaka1997 na huu ni mkesha wa 25.

Mkesha wa kuliombea Taifa umeandaliwa na Kanisa la Tanzania Fellowship of Churches (TFC) kwa kushirikiana na makanisa mengine yaliyopo Mkoa wa Dodoma na utajumuisha waumini wa dini zote huku ukiambatana na burudani za kusifu na kuabudu kutoka kwenye kikundi cha The Unity Praise Team pamoja na waimbaji binafsi.