MITUNGI YA GESI 1000 YAGAWIWA KWA MAKUNDI MAALUM JIJINI DODOMA

Imetumwa : September 20th, 2024

Katika harakati za kuunga mkono jitihada za Rais wa Tanzania Mhe. Dkt. Samia Suluhu Hassan kwenye matumizi ya nishati safi ya kupikia, Mkuu wa Mkoa wa Dodoma Mhe. Rosemary S. Senyamule amegawa mitungi 1000 ya gesi ya kupikia kwa makundi mbalimbali ya jijini humo. 

 Hafla ya ugawaji wa mitungi hiyo imefanyika leo Septemba 20, 2024 kwenye viwanja vya Nyerere Square Jijini Dodoma kwa lengo la kuhimiza utunzaji wa mazingira sanjari na kuboresha afya husuani za kina mama wanaotumia nishati hiyo kupikia.

 “Mkakati umetengenezwa Katika kipindi cha miaka kumi kuanzia 2024 hadi 2034 ambao utatuongoza watanzania namna ambavyo 80% ya watanzania kufikia 2034 wawe tayari wanatumia nishati safi, kwa kuanza na makundi yenye watu wengi, taasisi zenye mikusanyiko mikubwa na zinazotumia nishati chafu kwa wingi” Amesema Mhe. Senyamule 

Hata  hivyo, Mkuu wa Wilaya ya Dodoma Mjini Mh. Jabir Shekimweri, ametoa tathmini ya athari ya matumizi ya nishati chafu kwa afya.

 “Takwimu zinaonesha watu Milioni 4 hufariki mapema duniani kutokana na kutumia nishati chafu. Wakati wa uzinduzi wa mkakati huu kitaifa, takwimu zilitolewa, watu 33,000 hufariki kila mwaka nchini kwa matumizi ya nishati chafu hususan mkaa. Ukitafsiri takwimu hizo, watu 33,000 ni wastani wa watu 2850 kwa mwezi na 88 kila siku” Amesema Mhe. Shekimweri 

Aidha, Waziri wa Madini na Mbunge wa Dodoma Mjini Mhe. Anthony Mavunde ambaye ndiye mfadhili wa mitungi hiyo, ametaja lengo kuu la kutoa mitungi hiyo kwa makundi ya jimbo lake. 

 “Kwa kushirikiana na Jiji la Dodoma, tutaendelea kuhakikisha matumizi ya teknolojia mbadala ya matumizi ya mkaa mbadala ambao hauna madhara kwa mazingira, mkaa wa kutumia makaratasi, plastiki na magome ya ndizi ili tuweze kuwasaidia watu wetu kuachana na zoezi la kukata miti ili kupunguza uharibifu wa mazingira, dunia iwe sehemu salama ya kuishi” Mhe. Mavunde 

Hafla ya ugawaji wa mitungi na majiko ya gesi, imefanywa na Mbunge huyo ikiwa ni endelevu ambapo sasa inatimiza jumla ya mitungi 2500 iliyogawiwa tangu kuanza kwa zoezi hilo. Mitungi na majiko hayo imegawiwa kwa shule, Zahanati, Vituo vya afya, vituo vya watoto yatima na mama na baba lishe.    

                                                                         #keroyakowajibuwangu #dodomafahariyawatanzania

ReplyForward Add reaction