MKUU WA MKOA WA DODOMA ATANGAZA UKOMO WA VIONGOZI WA SERIKALI ZA MITAA

Imetumwa : October 19th, 2024

Na Hellen M. Majid,

Habari – DODOMA RS

Mkuu wa Mkoa wa Dodoma Mhe. Rosemary S. Senyamule, ametangaza ukomo wa madaraka kwa viongozi wa Serikali za mitaa leo Oktoba 19, 2024 kwenye mkutano na waandishi wa habari uliofanyika kwenye ukumbi wa ofisi yaje jengo la MKapa Jijini Dodoma.

Ukomo huo wa madaraka ni kwa viongozi ngazi za wenyeviti wa vijiji, vitongoji, mitaa pamoja na wajumbe wa Halmashauri za vijiji na Kamati za mitaa.

“Kila mmoja anapaswa kufahamu kwamba, kwa mujibu wa kanuni za Uchaguzi wa Serikali za mitaa, Madaraka ya uongozi kwa nafasi zilizotajwa, yanakoma kwa siku saba (7) kabla ya siku za kuchukua fomu za kugombea uongozi wa nafasi hizo” Mhe. Senyamule

Aidha, Mkuu wa Mkoa, ametoa msisitizo kwa viongozi hao kukabidhi vitendea kazi vyote vya Serikali.

“Kama kuna yeyote kati yao mwenye kitendea kazi chochote cha ofisi, akabidhi kitendea kazi hicho kwa mamlaka husika hivyo, naelekeza Wakurugenzi wa Halmashauri zote kufuatilia utekelezaji wa agizo hili”

Sambamba na hilo, Mhe Senyamule ametoa rai kwa wananchi wa Dodoma kuendelea kujitokeza kwa wingi kujiandikisha ikiwa imebaki siku mbili.

“Wakazi wote wa Dodoma ambao bado hawajajiandikisha, kutumia vema siku chache hizi zilizobaki kujitokeza vituoni kwenda kujiandikisha washiriki kikamilifu katika uchaguzi huu ili kuimarisha maendeleo ya vijiji, vitongoji na mitaa yao”

“Serikali za Mitaa, Sauti ya Wananchi, Jitokeze Kushiriki Uchaguzi”

#ujanjanikujiandikisha            

#dodomatwendenitukajiandikishe