MPWAPWA KUNIFAIKA NA BWAWA LA BILIONI 27

Imetumwa : March 2nd, 2023

Serikali imetoa fedha kiasi cha Shilingi bilioni 27.9 kwa ajili ya ujenzi wa bwawa la Msagali litakalotumika kwa shughuli za kilimo biashara katika Kata ya Ng’ambi na Chunyu, Wilaya ya Mpwapwa, Mkoani Dodoma.

Akikagua maendeleo ya ujenzi huo Mkuu wa Mkoa wa Dodoma Rosemary Senyamule amesema kukamilika kwa bwawa hilo kutasaidia Wilaya ya Mpwapwa na maeneo ya jirani kujishughulisha na kilimo mwaka mzima.

"Ndugu zangu Rais wetu Mhe. Samia Suluhu Hassan amedhamiria kuwakomboa wana Mpwapwa kwa kuleta mradi huu mkubwa ambao utakuwa ni mkombozi kiuchumi na kijamii, rai yangu ujenzi huu uzingatie viwango vya ubora na ukamilike kwa wakati" Amesisitiza Mhe. Senyamule.

Bwawa hilo lenye ukubwa wa hekta 1428 sawa na kilometa za mraba 14 litakuwa na ukubwa wa mita za ujazo 92.2 sawa na lita bilioni 92.2 na ujenzi wake umefikia asilimia 30 tangu kuanza kwake miezi minne iliyopita.

Akiwasilisha taarifa ya ujenzi wa bwawa hilo Mhandisi wa Umwagiliaji Wilaya ya Mpwapwa, Bw. Nuru Simkoko amesema bwawa hilo litakuwa na uwezo wa kumwagilia zaidi ya hekta 3,500 na kunufaisha skimu ya umwagiliaji ya Msagali iliyopo umbali wa kilometa saba kwa kupokea maji kutoka bomba namba mbili ambapo itakuwa ni suluhu ya maji ya uhakika na njia ya kukabiliana na athari za mabadiliko ya tabianchi.

Kwa upande wake Katibu Tawala wa Mkoa wa Dodoma Dkt. Fatuma Mganga amesema ni matarajio ya Serikali kuwa bwawa hilo litakuwa mkombozi kiuchumi na kuwata wananchi hao kuwa walinzi wa miundombinu ya Serikali inayogharimu fedha nyingini.

“Wakazi wa Mpwapwa muwe tayari kulima kilimo cha mwaka mzima, bwawa hili litakuwa na manufaa kiuchumi, mazingira na afya kwa ujumla” Amesisitiza Dkt. Mganga.

Ujenzi wa bwawa unagharimu kiasi cha shilingi Bilioni 27.9 na kazi ya ujenzi inafanywa na kampuni ya wazawa ya GNMS Contactors Co. Ltd kutoka Iringa na ujenzi unatarajia kukamilika mwezi Novemba 2023.