MWENGE WA UHURU 2025 MKOA WA DODOMA KUPITIA MIRADI YA BILIONI 61.1

Imetumwa : April 19th, 2025

Na. Hellen M. Minja

       Habari – DODOMA RS

Mwenge wa Uhuru mwaka 2025 Mkoa wa Dodoma ambao utapokelewa siku ya Jumapili Aprili 20, 2025, unatarajiwa kukimbizwa umbali wa Kilometa 1350 na kupitia miradi yenye thamani ya shilingi 61,105,007,015.00 iliyopo katika Halmashauri nane (08) za Mkoa.

Hayo yamebainishwa na Mkuu wa Mkoa wa Dodoma Mhe. Rosemary Senyamule katika taarifa yake kwa vyombo vya habari juu ya mbio za Mwenge wa Uhuru 2025 katika Mkoa wake aliyoitoa leo Aprili 19, 2025 kwenye ukumbi wa Ofisi yake jengo la Mkapa Jijini humu.

“Mwenge wa Uhuru 2025 utakimbizwa umbali wa Km. 1,350, utapitia miradi 56 kati ya hiyo miradi 16 itawekewa mawe ya msingi, miwili itafunguliwa, 24 itazinduliwa na 14 itatembelewa. Miradi yote ina thamani ya shilingi 61,105,007,015.00 katika mchanganuo ufuatao, Serikali kuu Bil. 39.358 Halmashauri Bil. 3.615 Wafadhili Bil. 5.997 na nguvu za wananchi Bil. 12.133”

Aidha, Mhe Senyamule ametumia fursa hiyo kuwaalika wananchi wote wa Mkoa wa Dodoma kujitokeza kwa wingi kwenye mapokezi ya Mwenge wa Uhuru katika maeneo yote ambayo utapita kwani hii ni fursa nzuri kwao kuonesha umoja, kutangaza maendeleo yanayoendelea ndani ya Mkoa na kazi kubwa ambayo imefanywa na Serikali kwenye Mkoa.

Mwenge wa Uhuru 2025 Mkoani Dodoma unatarajiwa kupokelewa kimkoa kwenye uwanja wa CCM uliopo Kata ya Kibaigwa, Wilaya ya Kongwa, utapita Wilaya zote 7 na Halmashauri 8 ambapo tarehe 20, utakimbizwa Halmashauri ya Wilaya ya Kongwa, Aprili 21 Halmashauri ya Wilaya ya Chamwino, Aprili 22 Halmashauri ya Wilaya ya Chemba.

Kadhalika, Aprili 23 katika Halmashauri ya Wilaya ya Kondoa, Aprili 24 utakimbizwa katika Halmashauri ya Mji Kondoa, Aprili 25 Halmashauri ya Wilaya ya Bahi, Aprili 26 Halmashauri ya Jiji la Dodoma na tamati ya mbio hizo ni Aprili 27 ambapo utakimbizwa katika Halmashauri ya Wilaya ya Mpwampwa.

Kaulimbiu: “Jitokeze kushiriki Uchaguzi Mkuu wa Mwaka 2025 kwa Amani na Utulivu”

#dodomafahariyawatanzania

#keroyakowajibuwangu

#mtiwangubirthdayyangu

#karibumwengewauhuru2025mkoawadodoma