RAIS SAMIA AYAGUSA MAKUNDI MAALUM DODOMA

Imetumwa : March 24th, 2025

Na. Hellen M. Minja,

       Habari – DODOMA RS

Rais wa Jamhuri ya Muungano wa Tanzania Mhe. Dkt. Samia Suluhu Hassan, ametoa zawadi kwa Makundi maalum hususan watoto wanaoishi kwenye Makao pamoja na shule maalum zinazopatikana katika Mkoa wa Dodoma ambazo zimekabidhiwa na Mkuu wa Mkoa wa Dodoma Mhe. Rosemary Senyamule.

Akikabidhi zawadi hizo, katika hafla iliyofanyika kwenye viwanja vya Ofisi ya Mkuu wa Mkoa wa Dodoma eneo la Njedengwa, Jijini Dodoma Mhe. Senyamule amewataka wazazi kuwajibika kwenye malezo na makuzi ya watoto wao.

“Kila Mzazi aone kuwa analo jukumu la malezi na makuzi ya mtoto wake. Hiki alichokifanya Mhe. Rais ni kuunga mkono juhudi kubwa ambayo mnaifanya kwa hayo makundi ambayo mnayahudumia lakini pia ni faraja kuwa anatambua na kuthamini kazi kubwa ambayo mnaifanya” Mhe. Senyamule

Aidha, Mkuu wa Wilaya ya Dodoma Mhe. Jabir Shekimweri amesema, jambo alilolifanya Mhe. Rais ni sadaka ambayo sisi tunatakiwa kuiga ili kuweza kufanikiwa katika mahitaji yetu binafsi kwani pale tunapotoa kwa wengine ndipo tutapata zaidi.

Akiainisha mahitaji yaliyotolewa na Mhe. Rais, Katibu Tawala Mkoa wa Dodoma Bw. Kaspar K. Mmuya amesema;

“Dodoma ni moja kati ya Mkoa ambao Mhe. Dkt. Samia anaendeela kutukumbuka na kutupenda katika nafasi tofauti tofauti. Zawadi tulizopokea ni magodoro 477, Mashuka pea 450, Mablanketi 500, kilo za Sukari 1000, Maharage kilo 600, Mafuta ya kupikia dumu 13 za lita 20 kila moja, Unga wa Ngano kila kiroba kina kilo 25 na hapa tuna viroba 52 na Mchele kilo 2000”

Nae, Mwakilishi wa Vituo vilivyokabidhiwa msaada huo kutoka kituo cha watoto yatima cha Alhaafidh Islamic Centre, Wilaya ya Kondoa, Hajat Aisha Nobbe amemshukuru Mhe. Rais Samia na kusema kuwa wanamuombea dua kila wakati na huo umekua ni utaratibu wa kawaida kila wanapokutana kwa ajili ya ibada.

Msaada huo kutoka kwa Mhe. Rais Dkt. Samia, umekabidhiwa kwa wakuu wa Wilaya za Mkoa wa Dodoma ambapo utakwenda kugawiwa kwenye vituo 13 ambavyo vimekusudiwa na kutumika kusaidia watoto pamoja na watu wenye mahitaji maalumu ili kupunguza mzigo kwa watoa huduma wa vituo hivyo.

#dodomafahariyawatanzania

#keroyakowajibuwangu#mtiwangubirthdayyangu