RAS GUGU AKUTANA NA WADAU WA KOFFIH

Imetumwa : August 30th, 2023

Katibu Tawala wa Mkoa wa Dodoma Bw. Ally Gugu amefungua kikao cha Kamati ya Ushauri ya Mradi ya uboreshaji wa huduma za afya ya uzazi na mtoto kwa Halmashauri ya Mpwapwa kilichofanyika leo tarehe 30 agosti 2023 katika ukumbi wa Hospitali ya Mpwapwa.

Akizungumza katika kikao hicho Gugu amesema ni vyema kuzingatia mikakati iliyopo ili miradi ambayo ipo katika Halmashauri inakamilika kwa wakati na kuleta manufaa kwa wananchi.

Amesema wataalamu wanatakiwa kuhakikisha miradi inatekelezwa na kusimamia kwa ubora kama serikali ilivyokubaliana na wadau wa KOFIH kwa lengo la kuhakikisha miradi hiyo inakamilika kwa wakati kama ilivyokubalika.

“Kila Halmashauri ni lazima kuhakikisha vifaa tiba vinanunuliwa kwa wakati na wananchi  waweze kuvitumia, kunufaika na kuongeza tija kwa wananchi.

“Serikali yetu inatoa kipaumbele kwenye suala la afya hivyo tunaona Rais wetu wa Jamhuri ya Muungano wa Tanzania Mhe. Dkt. Samia Suluhu Hassan ametoa kipaumbele kwenye suala la afya ya mama na mtoto hivyo ni lazima tuhakikishe miradi yetu tunaipa kipaumbele” amesema Gugu

Naye Katibu  Tawala Msaidizi,  Afya, Lishe na Ustawi wa Jamii Mkoa wa Dodoma Dkt. Best Magoma amesema kikao hicho kina lengo la kuhakikisha miradi ya KOFIH inatekelezwa kwa wakati na kuweka mikakati ya ukamilishaji wake.

“Miradi inakuja ili wananchi waweze kupata huduma kwa ukaribu na kuweza kuokoa na kupunguza changamoto za wananchi”

Kwa upande wake Katibu wa afya Bi. Nice Moshi ameipongeza Halmashauri ya Mpwapwa kwa kujitokeza kwa wingi kuunga mkono  jitihada zinazotolewa na kuletwa na wadau wa KOFIH katika Halmashauri ya Mpwapwa

“KOFIH imeleta miradi ya afya na vifaa  tiba kwa ajili ya wananchi wa wilaya ya Mpwapwa hivo pongezi kwa KOFIH na kuna baadhi ya hospitali zilizofadhiliwa  zimeshaanza kutoa huduma za afya ambazo zimejengwa kwa fedha za KOFIH ambapo mwanzoni wananchi hao walikuwa wanafuata huduma hiyo mbali na hospitali ya Wilaya na kuweza kupata mafunzo kwa watumishi”.amesema Mosha.

Kikao hicho ni cha Pili ambapo kikao cha kwanza kilifanyika tarehe 15 Juni 2023 katika Halmashauri ya Mpwapwa.