RC SENYAMULE ATAKA MABADILIKO IDARA YA ARDHI DODOMA

Imetumwa : October 15th, 2022

Mkuu wa Mkoa wa Dodoma ameitisha kikao na watumishi wa Idara ya ardhi Mkoa wa Dodoma kwenye ukumbi wa Ofisi yake uliopo kwenye jengo la Mkapa, Barabara ya 8 ili kujadili migogoro mbalimbali ya ardhi inayoukabili Mkoa na kutafuta suluhu yake.

Kikao hicho kiwewahusisha watumishi wa idara ya ardhi, wakurugenzi wa Halmashauri zote 8 za Mkoa ambao ndio wamehusika kusemea changamoto za ardhi zinazozikabili halmashauri zao.

Kamishna Msaidizi wa Ardhi Mkoa wa Dodoma Bw. Thadei Kabonga amefungua kikao hicho kwa kuchanganua aina mbalimbali za migogoro iliyopo katika idara ya ardhi, changamoto zake na namna ya kuitatua.

“Ni lazima Maafisa ardhi wote tujue tunahusika na changamoto hii na baadhi ya tatuzi zake ni kufungua barabara kwenye maeneo yaliyopimwa ili kurahisisha kufikika kwa urahisi pia kuna baadhi ya Taasisi za umma zinachukua maeneo ya wanachi wakati hawana uwezo wa kuwalipa fidia. Hapa msimamo wa Wizara ni kuzitaka taasisi zisichukue maeneo ya watu kama haziwezi kulipa fidia kwani zinazalisha migogoro kwa wanachi” Amesema Bw. Kabonga

Nao wakurugenzi wa Halmashauri wamewasilisha kero za ardhi zinazowakabili ikiwa ni pamoja na ukosefu wa vitendea kazi kama vifaa vya kupimia ardhi, usafiri, upungufu wa watumishi kwenye idara, ukiukwaji wa sheria za ardhi kwenye idara pamoja na baadhi ya watumishi wasio waadilifu kushirikiana na wananchi kuzalisha migogoro

Mkuu wa Mkoa akizungumza na watumishi hao baada ya kusikiliza kero zilizowasilishwa ambazo zilipatiwa majawabu kutoka kwa Kamishna wa ardhi pamoja na Mhe. RC. Amesema kuwa watumishi wanapaswa kuwa na utaratibu wa pamoja wa kutatua migogoro ya ardhi kwani ni muhimu sana katika kuitatua kwa wakati.

“Tusiikimbie migogoro bali tuimalize kwani ndio kazi yetu. Nataka tujipe muda hadi mwezi Desemba mwaka huu migogoro yote inayoweza kutatulika itatuliwe. Kaimalizeni hiyo migogoro, tukiamua kuimaliza hii migogoro kwa Dodoma inawezekana, tukakae vikao tuamue hilo” RC Senyamule

Kadhalika, Mhe. Senyamule ametoa rai kwa watumishi hao kuwa wamepewa dhamana ya kutunza kitu kisichoongezeka na kuwataka kufanya kazi kwa uadilifu na heshima kubwa

“Rais anataka haki itendeke lakini sisi watumishi wake hatufanyi haki, mumepewa dhamana ya ardhi, nendeni mukatusaidie kuwapa haki wale waliokoseshwa haki zao kwa ukweli tuwasaidie” Ameongeza.

Hata hivyo, ameendelea kusisitiza kuwa watumishi wa ardhi wamepewa dhamana ya kutengeneza taswira ya nchi kupitia Dodoma hivyo wanapaswa kulinda kauli za viongozi wa nchi wanapokua nje ya nchi na kutoa sifa kwa nchi yetu kwani wanafanya kazi kubwa kuitangaza sifa ya nchi kimataifa na kuvutia wawekezaji.

“Natamani kuona mabadiliko makubwa kwenye idara ya ardhi nawaomba mukabadilike” Amesisitiza

MWISHO