RC SENYAMULE ATEMBELEA, AFANYA UKAGUZI SOKO JIPYA LA MACHINGA

Imetumwa : November 3rd, 2022

Mkuu wa Mkoa wa Dodoma Mhe. Rosemary Senyemule ametembelea na kufanya ukaguzi katika mitaa iliyokua ikitumiwa na wafanya biashara ndogondogo maarufu kama machinga wa Jiji la Dodoma ambao kwa sasa wamehamia kwenye eneo maalumu walilotengewa kwa ajili ya biashara zao lililopo Bahi road.

Mhe. Senyamule amekagua maeneo ya Independence squre, oneway na Nyerere squre ambayo yote kwa sasa yamepata mwonekano mpya baada ya vibanda vyote kubomolewa, maeneo kusafishwa na kubaki wazi

“Nawashukuru sana machinga kwa kukubali kuhamia hapa kwani sasa mitaa ya Jiji letu imepata sura mpya mfano pale oneway, unaweza kusimama independence squre ukaweza kuona mpaka mwisho wa barabara. Kwa kweli nawapongeza sana” RC Senyamule

Vile vile, Mhe. Senyamule amefurahi kuona wafanyabiashara hao wanafanya kazi kwa amani bila shida yoyote na mwonekano wa soko sasa umekua bora zaidi na pia ametoa maagizo kwa Halmashauri ya Jiji.

“Nafurahi leo tumetembelea hapa kukiwa na wauzaji maana kipindi chote ilikua ni kuja kutoa maagizo tu lakini sasa panaonekana kwa sura mpya. Nitoe maagizo kwa Jiji kuchukua hatua za haraka za kusafisha mitaa yote iliyokuwa ikitumika awali. Pia kwa soko hili, tuendelee kutunza mazingira, kamati za mazingira tukumbushane suala la usafi ili mahali hapa pawe na mandhari nzuri” Amesisitiza

Hata hivyo, Mkuu wa Wilaya ya Dodoma Jiji Mhe. Jabir Shekimweri aliyeambatana na Mkuu wa Mkoa katika ukaguzi huo, amesema ;

“Mpaka sasa machinga kwa umoja wao ambao tayari wameshahamia hapa ni asilimia 95. Jana tulipita kufanya ukaguzi kwenye mitaa kama tulivyofanya leo ili kuhakikisha hakuna machinga anayebaki mitaani na tunafanyia kazi maelekezo yako yote Mhe. Mkuu wa Mkoa, ikiwa ni p amoja na kuharakisha kuanza kwa kituo cha daladala hapa, usalama wa eneo hasa kwa upande wa kivuko kwenye barabara kubwa, tayari tumeweka alama za zebra na pia tumepata ushauri wa kuweka taa za barabarani” DC Shekimweri

Serikali ya Mkoa imeahidi kutoa ushirikiano wa karibu kwa wafanyabiashara hao kwa kuunga mkono juhudi za Serikali za kuhakikisha machinga wanapata maeneo maalum ya kufanyia biashara zao kwani kwa Dodoma zimetimia na kuwataka wafanya biashara hao kulifanya eneo hilo kuwa la kitalii kwa kuwa na mwonekano wake wa kuvutia kama linavyoonekana hivi sasa.

MWISHO