RC SENYAMULE AWAHIMIZA VIJANA KUCHANGAMKIA FURSA ZA KUJIAJIRI

Imetumwa : November 18th, 2024

Na. Hellen M. Minja,

       Habari – DODOMA RS

Vijana waliomaliza vyuo vikuu na wanaotarajiwa kumaliza elimu hiyo, wametakiwa kujitokeza kwa wingi kwenye Kongamano la siku mbili la vijana lililoandaliwa na Taasisi ya Strategius Advisory Limited kwa kushirikiana na Ofisi ya Mkuu wa Mkoa wa Dodoma litakalofanyika katika ukumbi wa Jakaya Kikwete Jijini Dodoma.

Akizungumza wakati wa Mkutano na waandishi wa habari kutangaza Kongamano hilo, Mkuu wa Mkoa huu Mhe. Rosemary S. Senyamule, amesema lengo Kongamano hilo ni kuwatambulisha vijana hao fursa mbalimbali zilizopo katika Mkoa wa Dodoma ili waweze kuzitumia kupata ajira au kujiajiri.

“Mkoa wa Dodoma una vijana 30% takribani vijana 1,035,000 kwa mujibu wa sensa ya 2022. Hili kundi ni kubwa ambalo linatakiwa kuwekewa mikakati maalumu Lengo kubwa ni kuwafanya vijana hawa ambao tayari wana ujuzi na elimu flani kutoka vyuo walivyosoma lakini wakitoka wanajiuliza wanakwenda kufanya nini,kuona fursa ambazo wanaweza kuzitumia kujiajiri” Mhe. Senyamule

Ameongeza kuwa Serikali imejipanga vilivvo katika kuwawezesha vijana wanaomaliza vyuo kwa kuwatengenezea mazingira ya kujiajiri.

“Serikali imetengeneza fursa nyingi, inayo fedha, mitaji, maeneo na vitu vingine vingi ambavyo baadhi ya vijana hawafahamu, Lakini vilevile wapo watu ambao tayari wameshazitumia fursa hizo na bado wenzao hawana taarifa ili waweze kuwatia moyo kuwa maisha huku nje si mabaya kama wanavyofikiria kwani mazingira ya kujiaji tayari yapo”

Hata hivyo, Mkurugenzi Mtendaji wa Taasisi hiyo Bi. Lilian Mkumbo, amesema Kongamano hilo litafanyika Novemba 19 na 20, 2024 na utaratibu maalumu wa kujisajili umeandaliwa ili kuweza kupata kumbukumbu za watakaoshiriki ambapo ni bure kupitia tovuti ya maandalizi inayojulikana kama www.grem.co.tz

#kurayakosautiyako              

#ujanjanikupigakura              

#dodomatukotayarikupigakura

#mtiwangubirthdayyangu