RC SENYAMULE AWAHIMIZA WANAWAKE WAJAWAZITO KUZINGATIA MAELEKEZO YA WAHUDUMU WA AFYA

Imetumwa : November 17th, 2024

Na;Happiness E. Chindiye

     Habari - Dodoma RS

Mkuu wa Mkoa wa Dodoma Mhe. Rosemary S. Senyamule amewahimiza wanawake wa Mkoa  huu na kote Nchini, kuzingatia maelekezo wanayopatiwa na Madaktari kipindi wanapogundua kuwa na ujauzito kwa kuhudhuria kliniki ili kusaidia kuimarisha usalama wa mtoto wakati wa kujifungua.

Wito huo umetolewa wakati wa Maadhimisho ya siku ya Mtoto  Njiti Duniani  ambayo hufanyika Novemba 17 kila mwaka, ikiwa ni  kutambua thamani ya uhai wa Mtoto aliyezaliwa mapema sana (Watoto Njiti) na kuondokana na  imani potofu kuwa Watoto wa aina hiyo ni laana au mkosi.

Maadhimisho hayo yamefanyika Kimkoa kwenye viwanja vya Hospitali ya Rufaa ya Mkoa wa Dodoma ambapo Mhe. Senyamule amesema,

"Nawasihii Wananchi wa Mkoa wa Dodoma zingatieni  maelekezo mnayopewa  na Madaktari pindi mnapogundua  kuwa na  ujauzito kwa kuwahi kuhudhuria kliniki mapema ili kupunguza athari zinazoweza kuepukika” .

Mhe. Senyamule ameongeza kwa kutoa wito kwa Wahudumu wa Afya kuendelea kufanya kazi kwa weledi  ili kunusuru kizazi hicho.

Naye Kaimu Mganga Mfawidhi wa Hospitali ya Rufaa ya Mkoa  Dodoma  Dkt.Baraka Mponda amesema Hospitali ya Rufaa Mkoa  Dodoma imeendelea kupunguza Vifo vya Watoto wanaozaliwa kabla ya wakati  (Njiti) ambapo kati ya watoto elfu moja, kumi na mbili pekee ndio waliofariki kutokana na sababu mbalimbali za kiafya ikiwemo mama Wajawazito kutohudhuria Kliniki mapema.

Dkt. Mponda amesema mafanikio hayo yametokana na uboreshaji wa huduma  ikiwemo huduma ya  Kangaroo, mashine za joto, kliniki na utoaji wa elimu  kuhusu malezi ya watoto hao.

Maadhimisho hayo yameongozwa na kauli mbiu isemayo “ Zaidi ya watoto Milioni 13 huzaliwa mapema sana kila mwaka. Upatikanaji wa huduma bora kwa kila mtoto unahitajika kila mahali alipo” . Huku takwimu zinaonesha kuwa kati ya watoto 2500 wanaozaliwa hospitalini hapo, watoto 1000 huzaliwa wakiwa njiti.

&&&

#kurayakosautiyako  

#ujanjanikupigakura                #dodomatukotayarikupigakura

#mtiwangubirthdayyangu