RC SENYAMULE AZINDUA WARSHA YA MAKASISI KANISA LA ANGLIKANA KANDA YA KATI

Imetumwa : October 12th, 2022

Mkuu wa Mkoa wa Dodoma Mhe. Rosemary Senyamule, amezindua Warsha maalumu ya Makasisi wa Kanisa la Anglikana Dayosisi ya Central Tanganyika ambapo amealikwa kama mgeni rasmi.

Warsha hiyo imelenga  kuzungumzia mahusiano ya uchumi na Kanisa kwani Kanisa hilo limejikita katika shughuli mbalimbali za kiuchumi kama vile Kilimo, uwekezaji katika majengo bora na  utunzaji wa mazingira.

Mhe. Senyamule amelipongeza Kanisa hilo kwa kushiriki katika kuinua uchumi kwani ndilo jambo ambalo Serikali inashughulika nalo kila uchao. “Nawapongeza sana kwa kuwekeza kwenye uchumi kwani tunatakiwa kurithi utajiri wa uchumi wa Kanisa. Hata kwenye maandiko matakatifu Mfalme Suleiman aliweza kujenga hekalu kubwa lenye mawe ya thamani kama dhahabu  na kadhalika kwa sababu alikuwa na uchumi mzuri na mkubwa”.

“Ukizungumza na watu , baadhi ya watu  wamekuwa wakiniambia hali ya hewa ya Dodoma inafanana na hali ya hewa ya  Israel, nasi basi turithi sio hali ya hewa tu bali na uchumi wake. Kitu mnachoongea leo kinaenda sambamba na kauli mbiu ya mkoa ambayo inasema ‘Dodoma, fahari ya Watanzania’. Tayari Serikali ya awamu ya sita  imetoa Tsh.221.0 bln kwa ajili ya kuhakikisha umeme unafika kila mahali Dodoma. Hivyo viongozi wa dini tuwekeze Dodoma . Fursa bado ni nyingi, bado tunahitaji hotel na kumbi za kisasa, huduma za afya,huduma za kimataifa na maeneo ya starehe ( recreational centre). Dodoma ni pamoja na Wilaya zake zote Saba”. Amesema Senyamule.

Aidha, Mkuu wa Mkoa amewatangazia fursa za uwekezaji zinazopatikana Dodoma, kwani kuna maeneo ya kutosha na watu mbalimbali wanakuja kuomba kuwekeza hapa hivyo kama kanisa lina nafasi linaweza kuitumia au kuitangaza kwa ajili ya uwekezaji. “Watu wanatoka kila nchi na kila mahali kuja kuwekeza Dodoma, fursa zipo nyingi. Nitoe wito kwa Kanisa na Viongozi wa dini, tuwekeze Dodoma” Ameongeza

Naye Askofu Mkuu wa Kanisa la Anglikana Dayosisi ya Tanganyika,  Askofu Dickson Chilongani, amesema kuwa Kanisa lake linafanya uwekezaji katika kilimo pamoja na kuunga mkono kauli mbiu ya kuifanya Dodoma ya kijani kwa kufanya kampeni ya kupanda miti.

“Tumehamasisha kila Parish iwekeze katika majengo bora, kilimo cha Alizeti, Zabibu na Korosho  pia tunajihusisha na kauli mbiu ya kuifanya Dodoma ya kijani kwa kugawa miche 1000 ya miti kwa kila Parish .Tunataka kwenye kila  Parishi zetu 300, kila Parishi iwe imepanda miti 1000 hivyo baada ya muda tuwe na jumla ya miti 300,000.”  Amesema Askofu Chilongani.

Kanisa la Anglikana Dayosisi ya Tanganyika, limeandaa warsha ya siku tatu iliyoanza tarehe 11 Oktoba na inatarajiwa kutamatika tarehe 13 Oktoba. Warsha hii inashirikisha Makasisi wote wa Dayosisi ya kanda ya kati  lengo kuu ni kujadili namna kanisa linavyojihusisha na masuala ya kiuchumi.Kauli mbiu ya Warsha hiyo ikiwa  ‘Kanisa  na uwekezaji’. MWISHO