RUSHWA YA NGONO KWENYE VYUO VIKUU/ELIMU YA JUU NI HATARI KWA MSTAKABALI WA MAENDELEO YA KWELI YA NCHI

Imetumwa : June 21st, 2020

Mkuu wa Mkoa wa Dodoma Dkt. Binilith Mahenge ameitaka Taasisi ya kupambana na kuzuia Rushwa TAKUKURU Mkoani Dodoma kwa kushirikiana na uongozi wa vyuo vikuu, elimu ya juu na klabu za kupinga Rushwa vyuoni kuhakikisha wanakomesha vitendo vya Rushwa ya ngono vyuoni. 

Dkt. Mahenge ametoa agizo hilo mwishoni mwa wiki wakati akifungua mafunzo ya siku moja ya kupambana na Rushwa ya ngono vyuoni kwa wanafunzi wa vyuo vikuu na elimu ya juu Mkoni Dodoma yaliyofanyika katika chuo cha mipango ya maendeleo vijijini ambayo yameendeshwa na TAKUKURU Mkoani Dodoma ambapo alibainisha kuwa Rushwa ya ngono vyuoni ina madhara makubwa kiuchumi, kijamii na kiutamaduni.

Amesema kuwa Rushwa ya ngono vyuoni inasababisha kuporomoka kwa Elimu na kuporomoka kwa sifa ya taaluma ya vyuo vikuu na Elimu ya juu. Dkt. Mahenge ametaja baadhi ya madhara yanayosababishwa na Rushwa ya ngono vyuoni kuwa ni pamoja na kuanguka kwa Elimu na maadili, kupatikana kwa wasomi wenye uwezo Duni wasiokuwa na sifa stahiki, wasomi kupata vyeti wasivyostahili.

Ameongeza athari zingine ni kuajiriwa watu wasiokuwa na sifa na utendaji kazi kuanguka makazini, mahusiano mabaya makazini, kuongezeka kwa magonjwa ya zinaa na UKIMWI, ongezeko la mimba zisizotarajiwa, ukiukwaji wa haki za binadamu na utawala bora.

Kufuatia athari hizo, ameitaka TAKUKURU kwa kushirikiana na uongozi wa vyuo vikuu na Elimu ya juu na Klabu za kupambana na Rushwa vyuoni kuweka mikakati ya pamoja ya kupambana na tatizo hili na kuhakikisha vyuo vinaweka sheria ndogo zenye kusimamia maadili kikamilifu.

Katika hatua nyingine, Dr. Mahenge amewaonya baadhi ya wanafunzi wa kike wa vyuo vikuu na vyuo vya Elimu ya juu Mkoani Dodoma wenye tabia za kutumia miili yao kama kishawishi cha kuwatega kingono Wahadhiri wa kiume kwa lengo la kusaidiwa kupata alama nzuri na kufaulu masomo/mitihani yao. 

Nae Mkuu wa TAKUKURU Mkoa wa Dodoma Bw. Sosteness Kibwengo amesema kuwa kuna ongezeko la malalamiko ya Rushwa yasiyo rasmi katika vyuo lakini taarifa rasmi zinazofikishwa TAKUKURU ni chache .

Ametaja kuwa tafiti iliyofanywa na TAKUKURU miezi ya mwanzoni mwa mwaka huu wa 2020 imeonesha kuwa asilimia 68% ya Watumishi wa vyuo na asilimia 57% ya wanafunzi wa vyuo walioulizwa katika utafiti huo walikiri kuwa bado kuna Rushwa ya ngono katika vyuo.

Kwa upande wa maoni ya wanafunzi wa vyuo, Kijana Amos Mgidange mwanafunzi wa chuo cha mipango ya maendeleo Vijijini - IRDP alisema kuwa, tatizo la Rushwa ya ngono vyuoni lipo na wakati mwingine lipo hata kwa wanafunzi wa kiume ambapo baadhi ya wahadhiri wa kike wamekuwa wakiwataka kingono wanafunzi wa kuime vyuoni.