SEKTA YA ELIMU IMEPEWA KIPAUMBELE MIAKA MINNE YA SAMIA

Imetumwa : March 21st, 2025

Na. Hellen M. Minja,

       Habari – DODOMA RS

Sekta ya Elimu inatajwa kupewa kipaumbele cha hali ya juu na Rais wa Tanzania Mhe. Dkt. Samia Suluhu Hassan kutokana na fedha nyingi kutolewa na Serikali yake kwa ajili ya Ujenzi wa miundombinu ya Elimu kuanzia ngazi ya awali hadi vyuo vikuu.

Mkuu wa Mkoa wa Dodoma Mhe. Rosemary Senyamule, ameyasema hayo Machi 21, 2025 alipoalikwa kufungua Mkutano wa Baraza la 11 la wafanyakazi wa Chuo Kikuu Huria katika Kampasi ya Dodoma Jijini humu.

"Katika historia ya Nchi Yetu, hakuna kipindi miundombinu ya elimu imejengwa kwa wingi kama wakati huu wa miaka minne ya Rais Samia, na hii sisi tunaiona kwa kuwa imejengwa kuanzia ngazi ya awali, chini kabisa mpaka Vyuo Vikuu, tumeshudia mabadiliko makubwa sana.

Katika miaka ya 60, Dodoma tulikua na madarasa 5,556 lakini katika miaka hii, tunajenga madarasa 1,661 tukapiga hesabu, kama angekua anajenga madarasa haya kwa spidi ya miaka ile, angetakiwa kutumia miaka 18 kujenga haya 1,661 kwa hiyo tukasema spidi hii ni ya kupongezwa" Ameongeza Mhe. Senyamule.

Awali, Makamu Mkuu wa Chuo hicho Prof. Elifas Bisanda, amesema hivi karibuni wamesaini Mkataba mpya wa Ushirikiano wa kuunda Baraza na chama cha Wafanyakazi ambapo katika mkataba huo wameweka uwezekano wa kufanya Mikutano kwa njia ya TEHAMA hivyo, Baraza hilo sasa litafanya mikutano miwili kwa mwaka.

Aidha ameongeza kuwa, Chuo chake kimeahidiwa kupatiwa eneo la ekari 50, nyuma ya Kiwanja cha ndege Msalato kwa ajili ya ujenzi wa Makao Makuu ya Chuo Kikuu Huria Tanzania hapa Dodoma ambacho kilitolewa maelekezo na Makamu wa Rais mnamo Desemba 14, 2022.

#dodomafahariyawatanzania

#keroyakowajibuwangu#mtiwangubirthdayyangu