SENYAMULE AWAPONGEZA MABINGWA CECAFA

Imetumwa : March 10th, 2023

Mkuu wa Mkoa wa Dodoma Mhe. Rosemary Senyamule amewapongeza Mabingwa wa CECAFA kwa upande wa Shule za Sekondari Fountain Gate kwa kuibuka mabingwa na kuupa heshima Mkoa wa Dodoma.

Amewapongeza leo katika hafla ya kupata chakula cha pamoja na wafanyakazi wa Ofisi yake pamoja na kukabidhi kombe kwenye Ofisi ya Mkuu wa Mkoa Dodoma, hafla iliyoenda sambamba na utoaji wa vyeti vya pongezi.

"Niwapongeze kwa kazi nzuri kuhusianisha mchezo na elimu kwa vijana wetu na kutoa matunda sahihi kwa kutupa heshima Mkoa wa Dodoma, niwapongeze kwa kutekeleza kazi kubwa, maelekezo, sera na dhamira ya Serikali katika kuinua michezo na kuliheshimisha Taifa. Serikali yetu inataka michezo ndio maana zipo Sheria na Sera za kuimarisha mchezo kwa kupitia Wizara ya Utamaduni, Sanaa na Michezo kwa namna imekuwa na Mikakati na mipango ya kutamani nchi yetu ifanye vizuri kwenye michezo hasa michezo maarufu duniani ikiwa ni pamoja na mpira wa Miguu (Football)” amesema Senyamule

Naye Mkurugenzi wa Fountain Gate Bw. Japhet Makau amesema tumekuwa tukihakikisha tunakuza vipaji vya watoto  ikiwa ni pamoja na kuimba, utangazaji na michezo kwa lengo la kuhakikisha elimu na mchezo vinaenda Pamoja.

"Tumefanikiwa kupeleka mabinti wa wawili nchini Moroco wanachezea match za huko, watoto wa nne wanasoma Marekani kwa miaka minne na mwaka huu mwezi wa sita tunatarajia mabinti wa wawili kwenda Spain wamealikwa kwa ajili ya Mashindano" amesema Makau.

Kupitia ushindi huo timu ya Fountain Gate wamefanikiwa kujinyakulia kiasi cha Shillingi Millioni Mia Mbili za Kitanzania kama washindi wa Michuano hiyo sambamba na kombe .