SENYAMULE AWATAKA WAFANYABIASHARA KUCHANGAMKIA FURSA

Imetumwa : June 8th, 2023

Mkuu wa Mkoa wa Dodoma Mhe. Rosemary Senyamule amewaasa Wafanyabiashara ndani ya Mkoa kuchangamkia fursa zinazo jitokeza ndani ya jiji hilo na kutosubiri wawekezaji wa nje ili kuendana na juhudi za Serikali za kukuza Mkoa huo katika Mazingira ya kisasa kwa kutoa huduma bora ili kuimarisha biashara kwenye masoko ya ndani na nje nchi.

Senyamule ametoa wito huo leo Juni 8,2023 alipo fanya kikao kazi na wafanyabiashara mbalimbali wakiwemo Umoja wa wafanyabiashara masokoni, Wamiliki wa Shule, wamiliki wa Nyumba za wageni na Kampuni binafsi na katika ukumbi Ukumbi wa Jiji Mkoani humo.

"Sisi kama Sekretarieti ya Mkoa wa Dodoma tuna dhamira ya kuhakikisha wafanyabiashara wanakaa katika Mazingira mazuri, wanapata huduma bora na pamoja na huduma za maofisini ikiwemo kutoa Leseni kwa wakati ili juhudi za Serikali ziendane na sekta binafsi hivyo hakikisheni mnatumia fursa hizo ili kuendelea kuifaharisha Dodoma "Amefafanua Senyamule

Vilevile, Mheshimiwa Mkuu wa Mkoa huyo ametaja mambo mawili ambayo Serikali ya Awamu ya Sita inatekeleza ili kuhakikisha biashara zinafanikiwa kwa kiwango kikubwa .

" kama tunavyofahamu wote juhudi za Mhe.Dkt Samia Suluhu Hassan Rais wa Jamhuri ya Muungano wa Tanzania amekuwa akitamani watu kufanya biashara kwanza kwa kutuelekeza sisi alietupa dhamana katika ngazi mbalimbali kila mtu kujali na kuthamini Mazingira ya wafanyabiashara

"Pili amekuwa akiimarisha miundombinu ya biashara ili kuweza kujitoshereza kwa wafanyabiashara na kurahisisha shughuli zao" Amesisitiza Senyamule

Nae, Katibu Tawala wa Mkoa wa Dodoma Bw. Ally Gugu

amewapongeza wafanyabiashara kwa kujumuika pamoja ili kuweza kuwasilisha changamoto zilizopo ndani ya masoko na kuyafanyia ufumbuzi. Pia, amewasisitiza zoezi hilo kuwa endelevu ili kupata wasaa wa kutatua changamoto kwa wakati pindi zinapojitokeza.

" ili kuhakikisha eneo letu la Makao Makuu kuwa eneo sahihi na wezeshi la wafanyabiashara lazima kuwa na mahali sahihi pakufanya biashara ambalo halitakuwa na changamoto ili biashara ziweze kushamiri na kuweza kupata faida ninyi binafsi ngazi ya mmoja mmoja na serikali kwa ujumla" Amesema Gugu

Awali kikao hicho kilianza kwa uwasilishaji wa changamoto zilizopo ndani ya masoko na zikapatiwa ufumbuzi na kwa pamoja kuja na maazimio mbalimbali ya kiutendaji.Pia kikao hicho kilihudhuliwa na Mkuu wa Wilaya ya Dodoma Mhe. Jabir Shekimweri.