SENYAMULE AZINDUA JUKWAA LA PILI LA VYAMA VYA USHIRIKA

Imetumwa : May 19th, 2023

Mkuu wa Mkoa wa Dodoma Mhe. Rosemary Senyamule amezindua jukwaa la pili la Maendeleo ya Vyama vya Ushirika  Mkoa wa Dodoma lenye dhamira ya kuinua uchumi wa vyama mbalimbali vya kifedha (SACCOS) na kukuza uchumi wa wakulima wa mazao ya kibiashara na kimkakati. Uzinduzi huo umefanyika hii leo tarehe 19/05/2023 katika viwanja vya Nyerere square jijini.

Akizindua jukwaa hilo Senyamule amesema vyama vya ushirika ni njia ya kuinua uchumi kwa haraka vile vile ni njia inayotoa fursa za uwekezaji na ajira.

"Vyama vya ushirika ni njia rahisi ya kujenga uchumi kwa haraka na sisi kama Serikali tuko tayari kuviwezesha vyama hivi vile vyenye nia ya dhati ya kushirikiana, wenyenia tutawainua na mtawaona watakuwa mfano wa kuigwa,Tumieni fursa zinazopatikana vizuri " Amesema Senyamule

Aidha Mhe. Senyamule amevitaka vyama hivyo viendelee kukua kwa kuongeza Idadi ya wanachama, hisa, amana, mitaji na uwekezaji vitu ambavyo vitawafanya kukua kiuchumi na kukuza uchumi wa Dodoma na Taifa kwa ujumla.

Kwa Upande wake Mrajisi na Mtendaji Mkuu wa Tume ya Maendeleo ya Ushirika Tanzania (TCDC) Dkt. Benson Ndiege amewataka wanachama wote wa vyama vya ushirika Mkoa wa Dodoma kujisajiri rasmi Hadi kufikia Mei 30 mwaka huu ambapo zoezi la usajiri litafikia kikomo.

Naye Kaimu Mrajisi Msaidizi Mkoa wa Dodoma Bw. Octavian Bidyanguze amesema vyama vya ushirika vimekuwa mstari wa mbele katika kutoa ajira kwa vijana wa kitanzania na kupunguza tatizo la ajira nchini kwani hadi sasa wamefanikiwa kuajiri watumishi 110 katika sekta tofauti kwa ajira za kudumu na mikataba ya muda mfupi.

Mkoa huo unajumla ya vyama vya ushirika 124 ambavyo vyama vya SACCOS ni 57,vyama vya kilimo na masoko AMCOS 49 na vyama vingine 18 ambapo jumla ya wanachama ni 11,359 kati yao wanawake ni 5,112 na wanaume 6,012 na jumla ya vikundi 235.