SENYAMULE AZINDUA MPANGO MKAKATI WA KUZIBITI MIGOGORO YA ARDHI

Imetumwa : July 18th, 2023

Mkuu wa Mkoa wa Dodoma Mhe. Rosemary Senyamule ametoa wito kwa Halmashauri ya jiji la Dodoma na kamati ya ardhi kufanya kazi kwa weledi ili kuutendea haki Mpango Mkakati wa kutokomeza kero za migogoro ya ardhi ambayo imekuwa mwiba mchungu kwa wananchi na kuchafua taswira ya jiji hilo kwa muda mrefu.

Wito huo umetolewa leo Julai 18,2023 wakati akizindua Mpango Mkakati wa Mkoa wa kushughulikia migogoro ya ardhi katika jiji la Dodoma halfa iliyohudhuriwa pia na Watumishi wa Halmashauri ya Jiji hilo, Madiwani, Kamati ya Ulinzi na Usalama ya Wilaya na Mkoa na Kamati ya Amani yenye wajumbe kutoka (dini mbambali) na vyombo vya habari.

"Kwa muda mrefu Mamlaka mbalimbali za Serikali zimekuwa zikijitahidi kutatua migogoro hii lakini imekuwa haiishi na wananchi kuendelea kulalamikia Serikali. Kwa uchunguzi tuliofanya kama mkoa tulibaini malalamiko mengi ni ya fidia na watu walioahidiwa kupewa viwanja mbadala. Kimsingi maelekezo mbalimbali yalikuwa yanatolewa ili kutafuta ufumbuzi wa suala hili.

"Napenda kuujulisha umma huu kuwa tarehe 27/06/2023 niliunda Kamati Maalumu ya kushughulikia tatizo hili na mnamo tarehe 7/7/2023 Kamati imewasilisha Mkakati huo ambao pamoja na hatua nyingine kama Mkoa tumejipanga kuutekeleza ili kutatua migogoro ya ardhi Dodoma. Rais wa Jamhuri ya Muungano wa Tanzania Mheshimiwa Dkt. Samia Suluhu Hassan amekuwa akiagiza kusikiliza kero za wananchi na kutoa ufumbuzi lakini pia dhamira ya kutaka kuona Jiji la Dodoma linakuwa Jiji bora na lenye hadhi"ameeleza Senyamule

Pia, Mhe. Senyamule amesema mkakati huo wa muda mfupi na muda mrefu utaenda kuhakikisha migogoro katika jiji la Dodoma inamalizika na kuwafanya wananchi wa Dodoma kuishi kwa Amani, utulivu na kuepuka migogoro isiyo ya lazima.

Kwa upande wake Mkuu wa Wilaya ya Dodoma Mhe. Jabir Shekimweri amemuhakikishia Mkuu wa Mkoa kuwa Uongozi wa Jiji wamejipanga vizuri katika kuhakikisha wanatatua changamoto za ardhi zilizopo kupitia Mkakati huo uliopangwa kutekelezwa kwa muda wa mwaka mmoja ambao unaanzia julai 2023 na unatarajiwa kukamilika ifikapo juni 2024.

‘’Nikuhakikishie Mhe. Mkuu wa Mkoa mimi na timu yangu tumejipanga vizuri kutekeleza Mkakati huu tutafanya vizuri kwasababu tumepanga kutoka ndani yetu kwahiyo kwa kujiamini tutasimamia na tutakuwa wakali kwa wote watakaotaka kutukwamwisha katika zoezi hili" Amesema Shekimweri

Kwaupande wake Kamishna wa

Ardhi Msaidizi Mkoa wa Dodoma Jabir Singano amesema katika kuhakikisha changamoto hizo zinatatuliwa wataendelea kushirikiana na Ofisi ya Mkurugenzi wa Jiji la Dodoma na watahakikisha wanaongeza idadi ya watumishi wa ardhi ili kuongeza nguvu kazi ya kutatua kero hizo.

Katika kikao hicho Senyamule amezitaja changamoto zitakazopatiwa ufumbuzi ni pamoja na Madai ya viwanja mbadala, Madai ya fidia, Madai ya upimaji shirikishi wa 70% kwa 30%, Uvamizi wa viwanja, ucheleweshaji wa Hati miliki, ukosefu wa huduma bora kwa wananchi, Miliki pandikizi na mabadiliko katika Usimamizi wa Sekta ya Ardhi.