SERIKALI IMESHAFANYA MAMBO MAKUBWA KUTUWEZESHA KUINUKA-RC SENYAMULE

Imetumwa : March 5th, 2025

Na Francisca Mselemu

      Dodoma RS

Kuelekea kilele cha maadhimisho ya Siku ya Wanawake Duniani,Mkuu wa Mkoa wa Dodoma Mheshimiwa Rosemary Senyamule amewataka wanawake  wa Mkoa huu kutokusita kufanya biashara kubwa kwa sababu uwezo wanao, na tayari Serikali imeshaweka mazingira wezeshi.

Mheshiwa Senyamule ameyasema hayo leo Februari 05,2025 wakati wa Kongamano la Uwezeshaji Wanawake Kiuchumi lililoandaliwa na Taasisi ya ‘The Tunu Pinda Foundation kwa kushirikiana na Taasisi ya ‘Tanzania,China Women Empowerment Foundation’ na kufanyika katika Ukumbi wa Vijana Social Hall uliopo Area C Jijini Dodoma, ambapo alikuwa Mgeni Rasmi.

Akizungumza wakati wa hotuba yake, Mheshimiwa Senyamule amesema ‘‘Mara nyingi  Wanawake tumezoea kufanya biashara ndogondogo, zinazofanana fanana, tujiingize kwenye biashara kubwa kwa sababu uwezo tunao,na Serikali Yetu imeshafanya mambo makubwa kutuwezesha kuinuka”.

Aidha, Mhe. Senyamule amempongeza mwanzilishi na Mkurugenzi wa Taasisi hiyo Bibi Tunu Pinda(Mke wa Waziri Mkuu Mstaafu) kwa kazi kubwa anayoifanya ya kuhudumia Jamii, ambapo amesema kuwa Taasisi hiyo ilianza kwa udogo,lakini kutokana na upendo na matamanio yake ya kuona watu wanapiga hatua, na kwa sababu ya dhamira ya dhati aliyokuwa nayo, ndani ya muda mfupi imeweza kufanya mambo makubwa.

Kadhalika, Mhe. Senyamule amesema kuwa pamoja na kujivunia mafanikio makubwa ya wanawake katika miaka 30 ya Beijing, wanawake hao wanapaswa kutambua mchango wa wanaume.

‘’Tunaposhuhudia na kufurahia uwepo wa Rais Mwanamke, ni muhimu kufahamu kuwa hakuingia mwenyewe kwenye hiyo nafasi, bali alikuwepo Kiongozi mmoja ambaye katika historia ya Nchi Yetu ni Kiongozi wa kwanza kumteua Makamu wa Rais Mwanamke, na ndiye huyu Rais wetu Samia Suluhu Hassan, ambaye ameonesha uwezo na kipaji kikubwa kilichopo ndani yake.

Kwa upande wake Waziri Mkuu Mstaafu Mhe. Mizengo Pinda, ambaye pia ni mlezi wa Taasisi hiyo amesisitiza juu ya umuhimu wa kufanya kazi kwa bidii.

“Uwe mwanaume,au mwanamke,ni lazima ukubali kwamba ili maisha yako yawe bora  ni lazima uchumi wako ubadilike,na ili uchumi ubadilike, ni lazima ufanye kazi , tena kwa bidi, ubunifu wa hali ya juu,na kutokuchagua kazi ”Amesema Mhe. Pinda.

Kongamano hilo lilikwenda sambamba na kukabidhi mabegi ya shule kwa ajili ya Wanafunzi wa shule mbalimbali za Dodoma pamoja na vyerehani kwa baadhi ya Wanawake na Viongozi wa Gereza la Isanga ili Wafungwa Wanawake waliopo katika gereza hilo waweze kufundishwa ushonaji, watakapomaliza kutumikia vifungo vyao wawe na ujuzi utakaowawezesha kukuza uchumi wao ambapo vitu hivyo vimetolewa na Taasisi hizo.