SERIKALI KUIMARISHA ULINZI NGAZI YA KATA

Imetumwa : October 4th, 2024

Na: Hellen M. Minja,      

    Habari - DODOMA RS

Serikali kupitia Wizara ya Mambo ya Ndani ya Nchi, ina mkakati wa kuimarisha ulinzi katika ngazi ya Kata kwa kuwaweka Wananchi kuwa karibu na Jeshi hilo na kurahisisha utoaji wa taarifa za viadhiria vya uvunjifu wa amani au matukio ya kihalifu.

Hayo yamebainishwa leo Oktoba 04, 2024 na Waziri wa Mambo ya Ndani ya nchi Mhe. Hamad Y. Masauni (MB), wakati wa Mkutano wa hadhara na wananchi wa kijiji cha Laikala kilichopo katika kata ya Sagala, halmashauri ya wilaya ya Kongwa ikiwa ni siku ya pili ya ziara yake ya kikazi katika mkoa wa Dodoma.

Waziri huyo amesema lengo hasa la mkakati huo ni kuimarisha uhusiano mzuri baina ya wananchi kwenye ngazi ya chini ya Serikali na Askari Polisi.

"Serikali inakuja na Mkakati wa kuimarisha ulinzi katika ngazi ya Kata hivyo, imetawanya Askari Kata wengi kwa dhumuni la wananchi kuwa karibu na Askari hawa. Pia Serikali ina mpango wa kujenga vituo vya Polisi Kata katika mwaka huu wa fedha na kukamilisha vituo vyote vilivyojengwa na Wananchi" Mhe. Masauni

Kadhalika, Mkuu wa Mkoa wa Dodoma Mhe. Rosemary S. Senyamule, amesema Serikali ya Mkoa inahakikisha inaweka usimamizi madhubuti wa fedha zinazotolewa na Mhe. Rais kwa ajili ya kutekeleza miradi ya maendeleo.

“Sisi Serikali ya Mkoa wa Dodoma, tutahakikisha tunasimamia kwa umakini mkubwa fedha zote zinazotolewa. Sifa mojawapo ya Kongwa inaongoza katika usimamizi wa miradi. Mwaka 2023, ofisi ya Rais TAMISEMI ilitoa tuzo kwa Halmashauri zilizofanya vizuri kwenye miradi na wilaya ya Kongwa iliongoza kwa kufanya vizuri hivyo fedha nyingi anazozileta zitasimamiwa vizuri” Mhe. Senyamule

Aidha, Mbunge wa Jimbo la Kongwa Mhe. Job Ndugai, amesema hali ya ulinzi na usalama kwenye jimbo lake inaridhisha kwani Polisi Kata wanawajibika kwa nafasi zao.

“Upande wa ulinzi na usalama, tunaye Askari Kata ambaye anajitahidi kuhakikisha watu wake wanakaa kwa usalama kwani 'center' yetu kubwa ya kibiashara haipo mbali na kuna wageni wengi wanaingia, matukio baadhi yanatugusa kwa namna moja au nyingine lakini askari wetu wako imara, wananchi wako salama” Mhe. Ndugai

Katika ziara hiyo, Mhe. Masauni alitembelea na kufungua Mradi uliokamilika wa chumba kimoja cha Maabara ya masomo yote ya sayansi iliyojengwa kwa fedha za ndani za Halmashauri hiyo kwenye shule ya Sekondari Laikala. Maabara hiyo imegharimu kiasi cha Shilingi Milioni 60.

#dodomatukotayarikujiandikisha

#dodomafahariyawatanzania

#keroyakowajibuwangu