“TUNAJIVUNIA KUISHI WALICHOANZISHA WENGINE ILI TUPATE MATOKEO “ - RAS MMUYA

Imetumwa : November 18th, 2024

Na. Hellen M. Minja,

       Habari – DODOMA RS

Katibu Tawala Mkoa wa Dodoma Bw. Kaspar K. Mmuya, ameshiriki zoezi la upandaji miti katika eneo la JK Square lililopo ndani ya Chuo Kikuu cha Dodoma (UDOM) wakati wa maadhimisho ya kumbukizi za siku za kuzaliwa kwa waliozaliwa mwezi Novemba, tarehe 18,Novemba, 2024.

Maadhimisho hayo ambayo huenda sambamba na kampeni ya ‘mti wangu, birthday yangu’  inayohamasisha watu kupanda miti ikiwa ni sehemu ya kumbukizi ya siku zao za kuzaliwa lakini pia kuifanya  Dodoma kuwa ya kijani.

“Tumechagua program hii bila kujali alianzisha nani haya maneno, sisi tunayaishi kwa vitendo. Tupande, miti kwenye matukio yetu ya birthday, lengo letu ni kuleta matokeo ya mawazo mazuri yote wanayoanzisha watu duniani. Tunajivunia kuishi walichoanzisha watu ili tupate matokeo dunia hii iwe ‘green’ Amesema RAS Mmuya.

Hata hivyo, mwakilishi wa uongozi wa Chuo Kikuu cha Dodoma Profesa Albino Tenge amesema eneo lililopandwa miti lina historia maalumu na limewekwa rasmi kama mahali pa kupumzika kwa kupata kivuli kwani watu wengi wakifika Dodoma, hupenda kutembelea UDOM na sasa watakua na mahali maalumu pa kupumzikia.

Naye Msimamizi wa eneo hilo ikiwa ni pamoja na zoezi zima la upandaji miti na kupendezesha Mhandisi David Chitemo amesema;

“Tulianza kwa kusafisha eneo hili lenye ukubwa wa ekari 7 lakini eneo lote lina ekari 10, awamu ya kwanza ya uzinduzi tulipanda miti 780 iliyohusisha miti ya matunda na miti mingine ya kawaida. Tumeongeza mashimo 492 ambayo ndio imepandwa leo. Miti iliyopandwa mwezi wa 10 ni miti 7 tu ndiyo iliyokufa lakini tumeweka mingine mipya”. Mhandisi Chitemo.

Kampeni hii iliyoasisiwa na Katibu Tawala Mkoa wa Dodoma Bw. Kaspar Mmuya, ni endelevu kwa kila tarehe 18 ya mwezi ambapo wazaliwa wa mwezi husika watafanya kumbukizi zao kwa kupanda miti kwa lengo la kutengeneza maeneo ya kupumzikia katika Jiji la Dodoma.

#kurayakosautiyako              

#ujanjanikupigakura              

#dodomatukotayarikupigakura

#mtiwangubirthdayyangu