“TUPO TAYARI KUPENDEZESHA DODOMA" PROF.USILUKA

Imetumwa : September 13th, 2022

Makamu Mkuu wa Chuo Kikuu cha Dodoma, UDOM, Prof. Lughano Jeremy Kusiluka, amemtembelea Mkuu wa Mkoa wa Dodoma Mhe. Rosemary Senyamule ofisini kwake kwa lengo la kujitatambulisha.Prof. Lughano ni Makamu Mkuu mpya wa Chuo Kikuu UDOM,akiwa ameteuliwa hivi karibuni akitokea katika Chuo Kikuu cha Mzumbe kilichopo Mkoani Morogoro.

Mkuu wa Mkoa amempokea Makamu huyo na kumueleza matamanio ya Mkoa wa Dodoma hasa kwa Taasisi kubwa kama UDOM.Mhe.Senyamule amemweleza Prof. Lughano Jeremy kuwa anatarajia  kuona  matokeo yanayotokana na uwepo wa Chuo hicho kwa Mkoa mzima wa Dodoma, kwani anaamini kuna wataalamu wa kutosha kuweza kutoa mawazo ya kuanzishwa kwa vivutio mbalimbali ambavyo vitavutia watalii wa ndani na nje ya Tanzania kuitembelea Dododma ikiwa ndio Makoa makuu ya nchi ya Tanzania.

Hata hivyo, Mhe. Senyamule ameendeelea kusisitiza suala la utunzaji wa mazingira kwa kuwa Chuo kina wataalamu wa kutosha kuweza kubuni mbinu mbalimbali zitakazosaidia kwenye utunzaji wa mazingira kwani Dodoma inahitaji kuwa safi wakati wote ifanane na makao makuu ya nchi.

“Tunaendelea na kampeni ya kuifanya Dodoma ya kijani, na nyinyi ndio wa kutusaidia kwa hilo kwani mna rasilimali ya wataalamu wa kutosha kuifanya Dodoma ya kijani na safi” RC Senyamule

Tunatakiwa kusaidia kuinua uchumi kwa wakazi wa Dodoma hasa wanaoishi vijijini kwani wanatakiwa kufanana na hadhi ya Mkoa. Wengi wanategemea Kilimo na tayari Rais Samia Suluhu Hassan ameonyesha njia ya uwekezaji katika Sekta ya kilimo hivyo tunahitaji wataalamu kusaidia katika hilo.

Makamu huyo wa UDOM amesema kuwa wameshaanza vikao kwa ajili ya kampeni ya kuipendezesha Dodoma kwani wataalamu hao wapo. Pia ameongeza kuwa mpaka sasa Chuo kina wanafunzi 32,000 na wafanyakazi 1,300 na wanatarajia kuongezeka kila mwaka na hii yote ni rasilimali ya kutosha kuibadilisha Dodoma.

MWISHO