TUSISUBIRI SIKU ZA USAFI WA MAZINGIRA DUNIANI-MAVUNDE

Imetumwa : June 2nd, 2023

Naibu Waziri wa Kilimo Mhe. Anthony Mavunde ametoa rai kwa wakazi wa Mkoa wa Dodoma kuwa mstari wa mbele katika kuhakikisha mazingira yote yako safi sambamba na kutokomeza Mifuko ya Plasitiki iliyopigwa marufuku kwa kuzingatia hadhi ya jiji hilo na kwa kuongozwa na kauli mbiu ya mwaka huu ya maadhimisho ya Mazingira Duniani ambayo ni "PIGA VITA TAKA ZA PLASITIKI "

Mavunde ametoa wito huo leo tarehe Juni 2,2023 wakati aliposhiriki zoezi la kufanya usafi ikiwa ni shamra shamra za wiki ya usafi wa Mazingira kwa vitendo ulioanzia katika viwanja vya Kona ya Meya wa Jiji na Mtaa wa Makole jijini humo.

"Natoa rai kwa wafanyabiashara wote na wananchi wote kwa ujumla hususani wa jiji la Dodoma kwa kushirikiana na Taasisi za Serikali likiwemo Baraza la Taifa la Hifadhi na Usimamizi wa Mazingira (NEMC) pamoja na Serikali za Mtaa kuhakikisha tunatokomeza Mifuko ya plastiki na kusimamia masuala ya usafi na uhifadhi wa mazingira katika maeneo yetu .

"Mheshimiwa Dkt. Samia Suluhu Hassan wa Rais wa Jamhuri ya Muungano wa Tanzania anafanya kazi kubwa sana ya kuliendeleza jiji letu la Dodoma na hapa ni Makao Makuu ya Nchi, ukienda Duniani kote moja ya sifa za Majiji ni Usafi wa Mazingira, hivyo niwaombe isiwe tu tunasubiri siku za Usafi wa Mazingira Duniani lakini usafi uwe Utamaduni wetu", Amefafanua Mavunde

"Dodoma lazima iwe safi iendane na hadhi tuliopewa, haiwezekani tukawa na jiji kubwa kama hili ambalo ni Makao Makuu ya Serikali likawa na taka zimeenea kila sehemu, sisi tuwe Mabalozi wa kwanza kwa kuhakikisha Dodoma yetu inakuwa safi sababu ndio sifa mojawapo ya Majiji na Miji Mikuu Duniani Kote",Amesisitiza Mavunde

Naye, Mkuu wa Wilaya ya Bahi Mhe.Godwin Godwe ambaye anakaimu pia Wilaya ya Dodoma kadhalika amemwakilisha amesema suala la usafi na Mazingira katika Mkoa wa Dodoma ni endelevu ni jambo ambalo linaufaharisha Mkoa wa Dodoma kwa kutunza Mazingira na kufanya Usafi hivyo amewapongeza Ofisi ya Makamu wa Rais Muungano na Mazingira kwa kuendelea kusimamia agenda ya mazingira nchini