UBORESHAJI MIUNDOMBINU YA ELIMU CHACHU YA KUINUA UFAULU DODOMA

Imetumwa : March 15th, 2025

Na. Hellen M. Minja,

       Habari – DODOMA RS

Mapinduzi ya kipekee yamefanywa na Serikali ya awamu ya sita chini ya Rais wake Mhe. Dkt Samia Suluhu Hassan, kuimarisha elimu kuanzia ngazi ya chini hadi ya juu kwa kuweka miundombinu ya kisasa inayosaidia walimu kufanya kazi na wanafunzi kusoma katika mazingira bora na salama.

Mkuu wa Mkoa wa Dodoma Mhe. Rosemary Senyamule, ameyasema hayo Machi 15, 2025 wakati wa sherehe ya kuwapongeza Walimu wa Wilaya ya Kongwa kwa kuongeza ufaulu katika mitihani ya Taifa shughuli iliyofanyika katika eneo Godauni, stendi ya mabasi.

“Serikali ya awamu ya sita ya Mhe. Dkt. Samia Suluhu Hassan imefanya mapinduzi ya kipekee, imeimarisha elimu kuanzia ngazi ya chini kabisa mpaka ya juu kabisa kwa kuweka miundombinu ambapo kwa Mkoa wa Dodoma ni takribani 24% ya miundombinu iliyojengwa tangu uhuru wa nchi yetu, hili ni jambo la kipekee.

“Leo hii tunashuhudia Kongwa ilivyochangia kwa kiasi kikubwa Mkoa wa Dodoma kuongeza ufaulu kwa 5.3% ndani ya mwaka mmoja kwenye matokeo ya Darasa la saba. Kazi hii mnayoiona ni taa nyekundu kwa watu wa Bahi, ni rahisi sana kuwa namba moja lakini ni kazi kubwa kubaki namba moja”. Ameongeza Mhe. Senyamule.

Aidha, Mkuu wa Wilaya ya Kongwa Mhe. Mayeka S. Mayeka amesema Mhe. Rais ameboresha miundombinu ya elimu ambayo inatakiwa kuendana na matokeo mazuri hivyo hili lililofanywa na Wilaya yake, linaleta tafsiri ya uwekezaji bora kwenye elimu.

Hata hivyo, Afisa Elimu Mkoa wa Dodoma Mwl. Vicent Kayombo ambaye pia amemuwakilisha Katibu Tawala Mkoa wa Dodoma, Bw. Kaspar Mmuya amesema Halmashauri ya Kongwa imepandisha ufaulu kati ya Halmashauri 10, Halmashauri ya  Kongwa ni ya 6 Kitaifa katika matokeo ya mitihani ya darasa la saba 2024.

Awali, akitoa taarifa ya ufaulu kwa Halmashauri yake, Mkurugenzi Mtendaji wa Halmashauri hiyo Dkt. Omary Nkullo ameeleza kuwa matokeo ya kumaliza elimu ya msingi ufaulu umekua ukiongezeka tangu 2022 hadi 2024 ambapo umeongezeka kwa 13.21%  

Wilaya ya Kongwa imefanya sherehe hizo zilizokwenda sambamba na ugawaji wa zawadi za fedha taslimu kwa walimu na wanafunzi wa shule za msingi na sekondari pamoja na tuzo kwa shule zilizofanya vizuri ikiwa ni motisha kwao kuzidi kujituma na kuendelea kuinua ufaulu zaidi na hatimaye kushika namba moja Kitaifa.

#dodomafahariyawatanzania

#keroyakowajibuwangu

#mtiwangubirthdayyangu