“UTASHI WA MHE. RAIS KUTATUA MASUALA YA KODI NI MKUBWA “ BALOZI SEFUE

Imetumwa : January 20th, 2025

Na. Hellen M. Minja,

       Habari – DODOMA RS

Kauli hiyo imetolewa na Mwenyekiti wa Tume ya Rais ya Maboresho ya Kodi,Balozi Ombeni Sefue wakati wa kikao na Wafanyabiashara pamoja na wadau mbalimbali wa kodi Mkoa wa Dodoma chenye lengo la kukusanya maoni na kuyawasilisha kwa Mhe. Rais ili kupata muarobaini wa kudumu dhidi ya changamoto zinazowakabili walipa kodi nchini.

Kikao hicho kimefanyika leo Januari 20, 2025 kwenye ukumbi wa mikutano uliopo jengo la Safina Jijini Dodoma kikiongozwa na Mwenyekiti huyo ambaye alikifungua kwa kusema;

“Tunapokea maoni yenu kuhusu namna ya kuboresha mfumo wa kodi kwa sababu malalamiko mengi Rais ameshayasikia na alichotutuma ni kurudi kwake na mapendekezo ambayo hatuwezi kuyaandika sisi wenyewe,lazima tuwasikilize nyinyi wadau. Utashi wa Mhe. Rais kutatua masuala ya kodi ni mkubwa”Balozi  Sefue

Akizungumza kwa niaba ya Mkuu wa Mkoa wa Dodoma Mhe. Rosemary Senyamule, Mkuu wa Wilaya ya Dodoma Mjini Mhe. Jabir Shekimweri, ameshauri;

“Kuwepo na namna mahsusi ya kikodi ya kuwaandaa na kuwawezesha wafanyabiashara wadogo waweze kushiriki katika uchumi shindani kwenye Makao Makuu ya Nchi, pia kufuatia ongezeko kubwa la watu, kuwe na ofisi mbili za kodi ili TRA iwe karibu zaidi na walipa kodi” Mhe. Shekimweri

Kadhalika, Katibu Tawala Msaidizi sekta za Biashara na Uwekezaji kutoka Ofisi ya Mkuu wa Mkoa wa Dodoma Bi. Mwajabu Nyamkomora ambaye alimuwakilisha Katibu Tawala Mkoa wa Dodoma Bw. Kaspar K. Mmuya, amesema;

“Mhe. Rais amesikia kilio cha Wafanyabiashara ndio maana ameunda Tume hii kwa ajili ya kusikiliza changamoto na kutoa mapendekezo ili kuhakikisha kwamba tunajenga mazingira ya kuwezesha biashara zetu zisonge mbele na kutoa ajira, kwani sekta binafsi ndizo zinazotoa ajira kwa wingi na zikiimarishwa zitaongeza pato la Nchi na familia”

Baadhi ya maoni yaliyopokelewa na tume hiyo kutoka kwa Wadau ni pamoja na; kupungua kwa utitiri wa kodi, kupanua wigo wa mlipa kodi, kuongeza idadi ya walipa kodi, Watendaji wa Mitaa wapewe elimu ya kutosha juu ya kodi kwani ndio wanaozungumza kwa karibu na Wananchi, Maafisa Kodi wawe na weledi kwenye utekelezaji wa majukumu yao.  

#dodomafahariyawatanzania

#keroyakowajibuwangu                               #mtiwangubirthdayyangu