VITUO VYA HUDUMA ZA AFYA 235 MKOA WA DODOMA VYAPATIWA VIFAA VYA TEHAMA

Imetumwa : September 11th, 2024

 Vituo 235 vya kutolea huduma za afya Mkoa wa Dodoma, vinatarajiwa kunufaika na vifaa vya Mradi wa kupanua matumizi ya Mfumo wa utoaji huduma za Afya Serikalini (GOTHOMIS) katika Mkoa wa Dodoma vilivyotolewa na Serikali ya Korea kupitia Shirika la KOICA linalotekeleza mradi huo Mkoani hapo. 

 Hafla fupi ya kukabidhi vifaa hivyo kwa Mkuu wa Mkoa wa Dodoma Mhe. Rosemary S. Senyamule, imefanyika leo Septemba 11, 2024 kwenye ukumbi wa ofisi yake, jengo la Mkapa Jijini Dodoma ikihudhuriwa na wawakilishi kutoka Wizara ya afya na TAMISEMI.

Akitoa Hotuba yake katika hafla hiyo, Mkuu huyo wa Mkoa ametoa wito kwa Mganga Mkuu wa Mkoa na wale wa Wilaya juu ya utunzaji wa vifaa hiyo vilivyotumia gharama kubwa kwa ajili ya kupanua matumizi ya Mfumo wa GOTHOMIS katika Mkoa wa Dodoma.

 “Vituo 135 vitapata vifaa hivi vikiambatana na usimikaji pamoja na mafunzo kwa watumiaji, vituo 82 vitapewa vifaa pekee hivyo, Wakurugenzi hakikisheni vifaa hivi vinasimikwa na kuanza kutumika ili tusipoteze dhamira ya waliotuwezesha. 

 “Mganga Mkuu wa Mkoa na waganga wa Wilaya, simamieni matumizi ya vifaa hivi na vitumike kwa mujibu wa watengenezaji. Watu watakaotumia mfumo wawe watu sahihi, makini, waadilifu, wenye utashi na uzalendo mkubwa”

Amesisitiza Mhe. Senyamule. Kadhalika, Naibu Katibu Mkuu wa TAMISEMI Dkt. Grace Maghembe, amesema Serikali ya awamu ya Sita imekua ikisisitiza Matumizi ya Mifumo ili kuondoa ukiritimba kwenye utoaji huduma pia mfumo utapunguza mianya ya rushwa na matumizi mabaya ya fedha lakini kikubwa ni kuboresha huduma kwa wananchi. 

 Naye, Mkurugenzi Mkaazi wa KOICA Bw. Man Sik Shin, amesema Serikali yake inashirikiana na Tanzania kwenye utekelezaji wa miradi ya sekta za elimu na afya ambapo Mradi huo umegharimu kiasi cha dola Milioni 6.2 na baadhi ya vifaa walivyokabidhi ni kompyuta, kompyuta mpakato, seva na vishikwambi kwa ajili ya matumizi ya mfumo wa afya.

 Mradi huo unalenga kwenye ununuzi na usimikaji wa vifaa vya kutolea huduma za afya, kusaidia usimikaji wa GOTHOMIS kwenye vituo hivyo, kuwajengea uwezo watumiaji wa mfumo na wataalam wa TEHAMA OR-TAMISEMI pamoja na kutoa ushauri wa kuboresha Mfumo huo.   

   #dodomafahariyawatanzania #keroyakowajibuwangu

ReplyForward Add reaction