WAZIRI MKUU MHE. KASSIM MAJALIWA AFURAHISHWA NA KASI YA UJENZI WA KIWANDA CHA MBOLEA

Imetumwa : December 21st, 2022

Waziri Mkuu wa Jamhuri ya Muungano wa Tanzania Mhe. Kassim Majaliwa ametembelea ujenzi wa kiwanda cha mbolea cha ITRACOM kilichopo kata ya Nala mkoani Dodoma na kupongeza kasi ya ujenzi wa kiwanda hicho huku akiwataka wananchi kuchangamkia fursa za ajira zilizopo kiwandani hapo.

Akizungumza na wananchi wa kata Nala mkoani Dodoma Waziri Mkuu wa Jamhuri ya Muungano wa Tanzanzia Mhe. Kassim Majaliwa ameipongeza Wizara ya Kilimo kupitia Waziri wake Mhe. Hussein Bashe kwa kuhamasisha agenda ya uwekezaji kwa  kuleta mapinduzi makubwa ndani ya sekta ya kilimo kwa kujenga kiwanda hicho ndani ya mkoa wa Dodoma.

Pia Waziri Majaliwa amewataka wakazi wa Dodoma kuchangamkia fursa za ajira na ujasiriamali katika kiwanda hicho ambacho mpaka sasa kina jumla ya wafanyakazi 972 na kinatarajiwa kuwa na idadi ya wafanyakazi zaidi ya 4,000 ifikapo mwaka 2023.

Aidha Waziri wa Kilimo Mhe. Hussein Bashe ameipongeza bodi ya kiwanda hicho kwa kuwa na wataalamu mbalimbali wanaohakikisha ubora wa mbolea hiyo kwakuzingatia mahitaji ya wakulima na kusema kuwa Wakulima watanufaika na mbolea ya ruzuku kwakuwa kiwanda hicho kimeanza uzalishaji na kinatarajia kuzalisha tani milioni 1 pindi kitakapo zinduliwa mapema mwezi Septemba 2023.

Mkuu wa Mkoa wa Dodoma Mhe. Rosemary Senyamule amesema kiwanda hicho kikubwa ndani ya mkoa wa Dodoma kitaleta tija kwa Wakulima wa Jiji la Dodoma na Tanzania kwa ujumla.

“Serikali tayari imekwisha toa agizo kwa Wakala wa Barabara za Vijijini na Mijini (TARURA) Kujenga barabara yenye urefu wa kilometa saba kwa kiwango cha lami kwa ajili ya kurahisisha shughuli za usafirishaji katika kiwanda hicho, pia kuwezesha upatikanaji wa maji kwa kuchimba visima vyenye thamani ya shilingi bilioni 7 pamoja na kumwongezea mwekezaji ekari 50 kwa ajili ya ujenzi wa nyumba za wafanyakazi, Kiwanja cha mpira pamoja na Kituo cha Polisi, ujenzi utakaoanza mapema Januari 2023” alisema Mheshimiwa Senyamule.

Mkoa wa Dodoma unatarajiwa kuongeza uzalishaji wa chakula pindi kiwanda hicho kitakapo kamilika mwaka 2023 kwakuwa kitasaidia wakulima kupata mbolea kwa bei nafuu na kuleta kilimo chenye tija.

ITRACOM FERTIZERS LTD ni Kampuni ya kuzalisha mbolea za FOMI (Mseto wa mbolea za asili ikiwemo samadi na mbolea za chumvichumvi). Kampuni hii imeanza uzalishaji wa aina tatu ya mbolea ya FOMI ambazo ni FOMI Otesha, FOMI Kukuzia na FOMI NENEPESHA  na kiwanda hiki kinatarajiwa kuzinduliwa rasmi mwezi Septemba 2023.