WAKAZI WA BUSI - KONDOA WATAHADHARISHWA JUU YA UTUNZAJI WA VYANZO VYA MAJI

Imetumwa : May 14th, 2025

Na. Hellen M. Minja

       Habari – DODOMA RS

Wananchi wa Kata ya Busi katika Halmashauri ya Wilaya ya Kondoa wametakiwa kuchukua tahadhari juu ya utunzaji wa vyanzo vya maji, kwani kwa sasa maji yanazidi kupungua kutokana na ongezeko la watu kila uchao lakini maji hayaongezeki.

Tahadhari hiyo imetolewa na Mkuu wa Mkoa wa Dodoma Mhe. Rosemary Senyamule Mei 13, 2025 alipokua akizungumza na wananchi hao wakati wa Mkutano wa hadhara uliofanyika katika viwanja vya Mahakama ya mwanzo ya Kata hiyo baada ya kutolewa kero ya ukosefu wa maji.

“Tunapoelekea maji yatazidi kupungua, na wenzetu wanatuambia vita kubwa Duniani itakayokuja ni kugombania maji.Kama tusipochukua tahadhari leo kuanza kutumia maji kwa vipimo, kutumia maji kwa tahadhari kutunza vyanzo vya maji ili yasipungue kwa sababu watu tunaongezeka kila siku lakini maji ni yaleyale. Hili jambo lipo mikononi mwenu”.

Aidha, Meneja RUWASA Wilaya ya Kondoa Mhandisi Loini Merinyo, amesema changamoto kubwa inayoikabili Kata hiyo ni wizi wa miundombinu ya maji hasa koki za kufungulia matenki ya kuhifadhia maji ambazo zimekua zikiibiwa kila zinapowekwa hali inayosababisha upotevu wa maji kwa kiasi kikubwa.

Awali, Mkuu wa Mkoa alitembelea mradi wa ujenzi wa nyumba nne za walimu katika shule ya msingi Foe iliyopo katika Kata ya Kalamba Halmashauri ya Kondoa ikiwa na jumla ya wananfunzi 402 wakiwemo wavulana 199 na wasichana 203 huku ikiwa na walimu watano walioajiriwa na wawili wakujitolea.

Mradi huo wenye thamani ya shilingi milioni 201.9 kutoka Mamlaka ya Elimu Tanzania na upo kwenye hatua za umaliziaji ambapo unatarajiwa kumaliza changamoto ya upungufu wa nyumba za walimu shuleni hapo hali itakayosaidia kuimarisha utoaji wa huduma ya elimu kwa wanafunzi wa Kata hiyo.

Akiwa shuleni hapo, Mhe. Senyamule alipata fursa ya kuzungumza na Wazazi pamoja na Wanafunzi wa shule hiyo amesema kuwa uongozi wa Mkoa na Wilaya hiyo utahakikisha unaangalia namna ya kushughulikia mradi huo ukamilike haraka ili Walimu wafaidike kama ambavyo Mhe. Rais alikusudia.

#dodomafahariyawatanzania

#wekezadodomastawishadodoma

#keroyakowajibuwangu

#mtiwangubirthdayyaangu