WAKAZI WA NTYUKA WANUFAIKA WA MAJISAFI-DODOMA

Imetumwa : June 2nd, 2023

Naibu Waziri Wizara ya Maji Mhandisi Maryprisca Mahundi amewataka bodi ya tisa ya Maji kuendelea kuboresha maslahi na kutatua changamoto ya upatikanaji wa Maji kwa wananchi wa Mkoa wa Dodoma kwani ndio kazi kubwa ya Wizara ya Maji ili kuhakikisha kufikia dhamira ya Serikali ya awamu ya Sita inayoongozwa na Mheshimiwa Dkt.Samia Suluhu Hassan ya kumtua mama ndoo Kichwani inafanikiwa Kwa asilimia 100.

Mhandisi Mahundi amesema hayo leo Juni 1,2023 wakati akimwakilisha Waziri wa Maji Mhe.Juma Aweso kwenye hafla ya uzindua wa mradi wa maji safi eneo la Ntyuka Chimalaa na bodi ya tisa sambamba na kuaga bodi ya nane ya wakurugenzi ya Mamlaka ya majisafi na usafi wa mazingira Dodoma ilifanyika katika Ofisi za DUWASA jijini humo.

"Niwapongeze Mwenyekiti na Bodi nzima mpya uteuzi wenu unaonyesha imani ambayo Wizara inayo juu yenu ili muweze kisimamia vyema Menejimenti pamoja na watumishi wote wa DUWASA na kuendelea kuimarisha utendaji ilikuweza kupata matokeo yanayo tarajiwa katika nchi yetu "amefafanua Mahundi

Aidha ,Mheshimiwa Mahundi katika Uzinduzi huo ameitaka DUWASA kufikisha maji katika Zahanati ya Ntyuka ili kuhakikisha huduma ya maji inapatikana na wakina mama wanapokwenda kujifungua wapate maji ya kutosha.

"Dhamira ya Dkt.Samia ni kuhakikisha huduma ya maji inafika Kwa asilimia 100 katika maeneo ya yanayotoa huduma za kijamii ikiwemo kwenye vituo vya Afya hivyo basi Mkurugenzi Wa DUWASA nakuagiza kahakikishe huduma ya maji inafika kwenye Zahanati ya Ntyuka,"amesema Mahundi

Kwa Upande Wake Mkuu wa Mkoa wa Dodoma Mhe.Rosemary Senyamule amewapongeza Wizara ya Maji na timu nzima ya mamlaka ya maji Dodoma DUWASA kwa kuendelea kuimarisha huduma ya Maji ndani ya Mkoa hadi kufikia angalau nusu ya mahitaji yanayohitajika pamoja na ongezeko la watu katika jiji hilo.

"Tunafurahi kumekuwa na ongezeko la maji pamoja na uzinduzi wa miradi mbalimbali inayoendelea kuzinduliwa zote hizo ziko ndani ya matumizi ya maji hivyo naipongeza Serikali ya awamu ya sita kwa kuimarisha wizara hii kulingana na ongezeko linalo endelea la watu katika Mkoa huu " ,Amefafanua Senyamule

Awali akitoa Taarifa ya Mradi huo Mkurugenzi Mtendaji wa Mamlaka ya Majasafi na Usafi wa Mazingira (DUWASA) Mhandisi Aron Joseph,amesema kuwa Mradi huo utawanufaisha wakazi zaidi ya 4,441 katika maeneo ya Ntyuka mtaa wa Chimalaa na Nyerere ambao Kwa sasa watapata maji Kwa asilimia 97 kutoka asilimia 0 ya awali kwa gharama za Mradi huo Kwa awamu ya kwanza mpaka kufikisha maji Kwa wananchi ambao ndio walengwa imefikia zaidi ya Shilingi Milioni 471.